Астаналық жамағат арасында насихат жұмыстары жүргізілді

3 Қараша, 2017 16:26

Қарашаның 2-3-і күндері республикалық ақпараттық-түсіндіру тобы елорда тұрғындары арасында дін мәселелері жөніндегі профилактикалық іс-шара өткізді. Сондай ақ, күмәнді діни ағымдармен байланыста жүрген жастармен жекелеген пікіралмасу кездесулері болды.

Халық арасындағы мақсатты топтарға ерекше түсіндіру жұмыстары жүргізілді. Ақпараттық-түсіндіру тобының мүшелері Б. Есмахан, Б. Мырзаев және Ж. Дәуренов радикалды діни көзқарастағы адамдармен жеке кездесулер өткізіліп, оның ішінде түзету мекемелеріндегі сотталғандармен түсіндіру жұмыстары жүргізілді.

«Нұр Астана» мешітінде әйелдер жамағатымен кездесу барысында ақпараттық-түсіндіру тобының сарапшысы,

Г.Раздыкова: «Біздің негізгі міндетіміз ̶ зайырлы қоғамның дәстүрлері мен мәдени нормаларына сәйкес келетін діни сананы қалыптастыру және діни радикализм мен экстремизмнің ықпалынан арылту, әйелдер қауымының діни радикалдардың құралына айналуына жол бермеу, отбасында немесе қоғамда қандай да бір дискриминацияға ұшырамауын назарға алу», ̶ деді.

Дін саласындағы заң жобасына енгізілген негізгі өзгерістерді түсіндіру мақсатында қаладағы діни бірлестіктердің өкілдерімен жеке кездесулер ұйымдастырылды. Осы кезеңде түсіндірме жұмыстарына мешіттердегі жамағаттар, қалалық кәсіпкерлер, нарықтағы жұмысшылар, жастар, спорт мектептерінің оқушылары және т.б. қамтылды.

Барлық жаңалықтар