Елордада 474 нысан мүгедектердің қажеттілігіне бейімдендірілді

3 Қараша, 2017 13:31

2017 жылдың басынанқалада 282 пандус орнатылып, мүмкіндігі шектеулі азаматтардың ыңғайлылығы үшін бірқатар көшеде тактильді плиталар төселген деп хабарлайды Астана әкімдігінің медиа орталығы.

Соңғы статистикалық мәліметтерге сәйкес, 2017 жылдың басынан бастап Астанада 705 нысан паспортталса, олардың 474 мүгедектер үшін бейімдендірілген. Аталмыш нысандар денсаулық сақтау, спорт, мәдениет, білім беру мекемелеріне жатады. Олардың ішінде шағын жән орта бизнес нысандары да бар. Бұдан басқа, көптеген кәсіпкерлер жергілікті билік өкілдерімен, прокуратура органдарымен бірлесіп, мүгедектер үшін шектеусіз алаң құру ісіне ат салысып жатыр.

Сонымен қатар, 2017 жылдың басынан бастап Қазақстанның бас қаласында 282 пандус орнатылды. Кемтар азаматтардың ыңғайлылығы үшін А. Ахматова, Б. Бейсекбаев, С. Сейфуллин және Оқжетпес көшелерінде тактильді плиталар төселді.

Елорданың көліктік кәсіпорындары да мүмкіндігі шектеулі азаматтар үшін қолайлы ортаны қалыптастыру ісіне өз үлесін қосып отыр.

Бүгінгі күні қаладағы 1158 жолаушылар көлігінің 742-сі кемтар жандардың көлікке кіріп, одан шығуына арналған аумалы құрылғымен жарақталған. Техниканың қалған бірліктері қайта жарақтанудан өтуге жарамсыз, сол себепті олар жақын арада пайдаланудан шығарылатын болады.

Айта кетейік, мүгедектердің құқықтарын қорғау мен олардың өмірін жақсартуға бағытталған мемлекеттік бағдарламсының мақсаты елордада мүмкіндігі шектеулі азаматтар үшін шектеусіз орта қалыптастыру болып табылады.

Барлық жаңалықтар