Қазақстан ЕАЭО нарығының инвесторларына тиімді старттық алаң бола алады
3 Қараша, 2017 16:53
Алматы әкімі Бауыржан Байбек ҚР-дағы Индонезия Елшісі Рахмат Прамономен кездесті. Тараптар сауда- экономикалық, мәдени- гуманитарлық ынтымақтасты нығайтуды талқылап, туризм саласын дамытудағы тәжірибемен алмасты, деп хабарлады қала әкімдігінің баспасөз қызметі.
Кездесу барысында биылғы жылдың тоғыз айы ішінде Алматы қаласы мен Индонезия арасындағы тауар айналымы 2016 жылдың осы кезеңімен салыстырғанда 2,1 есе артып, 14,2 млн. АҚШ долларын құрағаны, алайда өзара ынтымақтастық әлеуеті әлі де жоғары екендігі айтылды.
Инвесторлардың ЕАЭО 180 миллиондық нарығына ену үшін Қазақстан тиімді старттық алаң екені атап өтілді. Алматыда «бір терезе» қағидасы бойынша инвесторларға қызмет көрсету Орталығы, Индустриалды аймақ, «ПИТ» АЭА, инвестициялық жобаларды жүзеге асыру үшін бірқатар преференциялар жұмыс істейді және жеңілдіктер қарастырылған.
Айта кетерлігі, Елші Р.Прамоно ҚР Президентіне сенім грамотасын биылғы жылдың 30 мамырында тапсырған болатын.
