Павлодар облысында 6 жаңа сүт-тауарлы фермасы ашылады

2 Қараша, 2017 20:43

Биылғы жылдың соңына дейін Павлодар облысында алты жаңа сүт-тауарлы ферма іске қосылып, соның арқасында қазіргі кезде 80 пайызға ғана жұмыс істеп тұрған сүт өңдеу кәсіпорындары толыққанды жұмыс істей бастайды, деп хабарлады облыс әкімдігінің баспасөз қызметі.

Павлодар ауданына жасаған жұмыс сапары кезінде аймақ басшысы Луганск және Розовка ауылдарында салынып жатқан екі СТФ-да болды. Құны 250 миллион теңгені құрайтын «Луганск» кооперативінің фермасындағы жұмыстар 80 пайызға, ал жалпы инвестициялар көлемі 816 миллион теңге болатын «Киров» ЖШС-ің жобасындағы жұмыстар 90% аяқталған. Жылдың соңына қарай фермалардың екеуі де жұмыс істей бастайды.

« Жалпы облыс бойынша жылдың соңына дейін жаңа технология бойынша салынып, жем-шөп базасымен қамтамасз етілген 6 сүт-тауарлы ферманы іске қосатын боламыз. Қазіргі кезде өңірдегі сүт зауыттары өзінің өндірістік қуатының 80 пайызы бойынша ғана жұмыс істеп тұр. Жаңа фермалар жұмысын бастағаннан кейін оларға қажетті сүт көлемі тапсырылатын болады. Қазір облыстық деңгейде сүт өндірушілерді қолдау бойынша жаңа бағдарлама құрастырылып жатыр. Біз сүт-тауарлы фермаларының құрылысы үшін алынған несиелердің 10%-ын субсидиялауға дайынбыз. Біздің мамандар аграрлық комиссиямен келіссөздер жүргізіп жатыр», – деді Болат Бақауов.

Барлық жаңалықтар