70 мың ақтөбелік «Халық қауіпсіздігін қамтамасыз ету» жобасымен қамтылды
Өңірдегі өзекті әлеуметтік сұрақтарды шешуге, діни экстремизмнің алдын алуға, мемлекеттік және салалық бағдарламалардың жүзеге асырылу сұрақтарын түсіндіруге, бизнес ортаны дамытуға бағытталған маңызды жоба 9 қазанда Әйтеке би, Хромтау, Мұғалжар, Темір, Мәртөк, Қарғалы, Байғанин, Шалқар аудандарында бастау алды.
«Ауқымды түсіндірме жұмыс пен діни мәселелер» бағытының аясында 324 шара өткізіліп, 12 814 ақтөбелікке экстремизм идеологиясының кесірі түсіндірілді, Ханафи мазхабының исламдағы рөлі ашылды. Теологтар мен сарапшылар 345 диструктивті діни ағым жетегінде жүрген 51 адаммен кездесу өткізді.
«Бизнес ортаны дамыту» бағыты бойынша 3548 тұлғаны қамти отыра 119 шара өткізіліп, бизнесті ұйымдастыру және жүргізу бойынша семинарлар мен тренингтер кезінде 640 адам оқытылды. 113 адамды қамти отыра «Бизнес Бастау» курстарына оқыту басталып, жалпы сомасы 274,2 млн. теңгеге 47 жобаны жүзеге асыру үшін көмек көрсетілді.
«Әлеуметтік мәселелерді шешу» бағыты барысында 325 шара өткізіліп, 13 123 адам қамтылса, оның ішінде 1548 азамат көмек алды. Өткізілген «Жақыныңа көмектес» атты 19 қайырымдылық акциясы кезінде 159 ақтөбелік жалпы сомасы 3 млн. 72,5 мың теңгеге көмек алды.
Аз қамтылған 452 отбасыға «Өрлеу» мемлекеттік бағдарламасына қатысу тәртібі түсіндіріліп, оның ішінде қырық жанұяға түрлі көмек көрсетілді. 639 жұмыссызбен жұмыс жүргізіліп, еңбекке орналастыру бойынша кеңестер берілсе, 144-і жұмысқа орналастырылды. 93 еңбек ұжымында кездесулер өткізіліп, 1217 жұмысшы қамтылды, 182 еңбек шартына қол қойылды.
Дәрігерлер 39 ота жасап, 8027 тұрғынға медициналық көмек берді.
Ақпараттық жұмыстар аясында ҚР президентінің Қазақстан халқына «Қазақстанның үшінші жаңғыруы: жаһандық бәсекеге қабілеттілік» атты жолдауын, «Жүз нақты қадам» ұлт жоспары мен мемлекет басшысының «Болашаққа көзқарас: қоғамдық сананы жаңғырту» бағдарламалық мақаласын түсіндіру бойынша 3008 адамды қамтыған 557 шара өткізілді.
