Алматылықтар емханаларға тіркелу үшін 40 мың өтінім берген

27 Қазан, 2017 20:32

Биылғы емханаға тіркеу науқаны басталғалы бері Алматы қаласы бойынша қырық мыңнан астам адам тіркеу туралы өтініш білдірген. Қыркүйектің 15-інде басталған жыл сайынғы дәстүрлі кампания 15 қарашаға дейін жалғасын таппақ. Бірақ бұл міндетті науқан емес. Бұрынғы емхананың қызмет сапасы қанағаттандыратын азаматтар өзге денсаулық сақтау нысанына қайта тіркелуге міндетті емес, деп хабарлады Әлеуметтік медициналық сақтандыру қорының баспасөз қызметі.

Жалпы, оңтүстік астанадағы медицина мекемелеріне 1,8 млн адам тіркелген. Дәстүрлі науқан барысында олардың бәріне кез-келген емдеу ұйымын таңдап, қайта тіркелуге мүмкіндік беріліп отыр. Қала бойынша халықты тіркеумен айналысып жатқан 83 медицина үйымының ішінде 35 жеке меншік клиника да бар.

Тіркелге болатын емдеу мекемелерінің тізімімен Әлеуметтік медициналық сақтандыру қорының fms.kz сайтынан танысуға болады. Ол үшін сайттағы «Клиника таңдау» бөліміне кіру қажет. «Медициналық көмектің түрі» графасына міндетті түрде назар аударыңыз. Өйткені азаматтар тек бастапқы медициналық-санитарлық көмек көрсететін клиникаларға ғана тіркеле алады.

Тіркелу рәсімі көп уақыт пен құжатты қажет етпейді. Өзіңіз таңдаған емханаға барып, жеке куәлігіңізді көрсетіп, бас дәрігердің атына еркін формада өтініш жазасыз. Бұдан басқа құжат талап етілмейді.

Сонымен қатар, азаматтар отбасының өзге мүшелерін де тіркей алады. Бұл үшін олардың жеке куәліктері (туу туралы куәлік) мен өтініштері қажет. Ал, өздігінше емханаға тіркелу құқығын пайдаланбаған тұрғындар тұрғылықты жері бойынша автоматты түрде тіркеледі.

Барлық жаңалықтар