Алматы-1-Шу қос тармақты жолында Аңырақай –Қордай қума жолында қозғалыс ашылды

Алматы-1-Шу екі тармақты жолындағы өткізу кешенінің құрылысын «Қазақстан темір жолы» ҰК» АҚ «Нұрлы жол» бағдарламасы аясында жүзеге асыруда.

«Біз екі жол телімінде №8 учаскесінде 4 шақырым және №9 учаскеде -3,923 шақырымында жұмысты аяқтап, пайдалануға бердік. Енді Аңырақай мен Қордай станциясының аралығында жүк және жолаушылар пойыздары қозғалысы ашылды»,-дейді «ҚТЖ» ҰК» АҚ Ірі жобалар жөніндегі дирекциясының Алматы-1-Шу теміржол телімінің екінші желісі құрылыс басқармасының бастығы Құмбай Байдәулетов.

Қазіргі таңда, Қордай станциясында жеті бағыттауыш бұрмасы қайта жаңғыртылды. Сонымен қатар 10 шақырымында (3611 метр), 11 шақырымда (3177 метр) телімдер Қордай-Отар 3882 блок бекетінде аяқталып келеді.

«Қазірдің өзінде ауқымды жұмыстар атқарылды. Бағыттауыш бұрмалар жаңғыртылды. Таяу болашақта Құлжабасы станциясында жұмыс аяқталатын болады. Сол кезде Қордай да, Отар станциясы қума жолдары толығымен 18,8 шақырымдық қос тарапты да өткізе алатын жолға айналады»,- дейді Қ. Байдәулетов.

Қазіргі таңда Алматы-1- Шу теміржолында барлығы 92 шақырым жол салынды. Құрылысшыларға енді 21 шақырымдық жол салу қалды.

Биылғы жылы бұл жобаны аяқтау көзделіп отыр. Алматы-Шу теміржолының бойынан 113 шақырымдық екінші теміржол желісін салу жұмыстары жалғасуда.