Польшада 800-ден астам қазақстандық студент білім алып жатыр – Д.Мыңбай

18 Қазан, 2017 10:33

Қазақстан Халқы Ассамблеясы Төрағасының орынбасары Дархан Мыңбай мен Польша Республикасы Ішкі істер министрлігі және әкімшілігінің мемлекеттік хатшысы – Репатриация істері жөніндегі комиссар Себастьян Хвалекпен кездесті, деп хабарлады Ассамблеяның баспасөз қызметі.

Іс-шараға Польша Республикасының Қазақстан Республикасындағы Төтенше және Өкілетті Елшісі Селим Хазбиевич, Польша Ішкі істер министрлігінің Азаматтық және репатриация департаментінің директоры Марек Зелинский, ҚХА өкілдері мен БАҚ өкілдері қатысты.

Кездесу барысында Қазақстан мен Польша арасындағы қоғамдық келісімді қамтамасыз ету, этносаралық қатынастар саласындағы саясатты және өзара іс-қимылдарды жүзеге асыру, қоғамдық келісімді нығайтуға бағытталған түрлі іс-шараларды бірлесе ұйымдастыру мәселелері қаралды.

Дархан Мыңбай сөз басында екі ел арасындағы қарым-қатынастың жоғары деңгейін және оны әрі қарай дамыту қажеттілігін атап өтті.

«Сондай ақ, биыл екі ел арасындағы дипломатиялық қарым-қатынастардың орнағанына 25 жыл толып отырғандығын және осы уақыт ішінде барлық салаларда жақсы серіктестік қарым-қатынасқа қол жеткіздік», - деді Д.Мыңбай.

Бүгінде елімізде Қазақстан поляктарының одағы жұмыс істеуде. Аталмыш одақтың бөлімшелері республиканың барлың өңірлерінде құрылған.

«Қазақстан аумағында поляктардың жеті этномәдени бірлестігі жұмыс істеп жатыр. Қазіргі таңда поляк тілі көптеген мектептерде оқытылуда. 800-ден астам қазақстандық студент Польшада білім алып жатыр. Бұған білім беру саласындағы ынтымақтастық туралы үкіметаралық келісім ықпал етуде. Біз бұл істі одан әрі дамытуды көздеп отырмыз» деді ол.

Польшаның ІІМ және әкімшілігнің бас хатшысы өз кезегінде Қазақстанның Польша үшін маңызды серіктестердің бірі екендігін атап өтті.