• Басты
  • 2014 жылы Қарағанды облысында 8 білім беру нысаны іске қосылады

2014 жылы Қарағанды облысында 8 білім беру нысаны іске қосылады

11 Қаңтар, 2014 11:40
2014 жылы Қарағанды облысы 8 білім беру мекемесін жөндеуден өткізіп, жаңадан салады деп жоспарлануда.

«Биылғы жылы 23,5 млрд теңгені аталмыш мақсатта игеру көзделген. Соның ішінде республикалық бюджеттен 18,8 млрд теңге, жергілікті бюджеттен 4,7 млрд теңге қарастырылған. 11 жоба іске асырылмақ. Ал 8 білім беру нысаны жаңадан салынып және жөнделмек. Сонымен қатар, «Қолжетімді баспана-2020» бағдарламасы бойынша 310 мың шаршы метр үй салу жоспарланған», - делінген акиматта.

2013 жылдың қорытындысы бойынша, облыста игерілген қаражат көлемі 22 млрд 457 млн теңгені құрады, бұл бөлінген қаржының 99,9 %-ы. Осы қаражаттың 5,4 млрд теңгесіне 298,4 мың шаршы метр баспана, 10,5 млрд теңгесіне инженерлік желілер мен жаңа сору станциясы және күн-жел электростанциясы салынды.

Сонымен қатар, 2013 жылы облыстық құрылыс басқармасы тарапынан 30 білім беру, денсаулық сақтау, коммуналдық шаруашылық, қоршаған ортаны қорғау және Бизнестің жол картасы нысанына жөндеу жұмыстары жүргізілді. Осы құрылыстың 13-і қазіргі күні қолданысқа берілсе, қалғандары биылғы жылдың еншісіне қалған.

 

Барлық жаңалықтар