Оңтүстік Қазақстанда жаңа мектеп пен балабақша ашылды

«Қайнарбұлақ ауылдық округі Ошақты ауылында 150 орындық Құрманғазы атындағы мектептің жаңа ғимараты пайдалануға берілді. Нысан құрылысын аудандық бюджет есебінен 223,823 млн. теңгеге «Асар строй групп» ЖШС-гі жүргізді. Бұрын бұл мектеп ыңғайластырылған ғимаратқа жайғастырылған болатын. Сынып бөлмелері тар, пән кабинеттері мен өзге де қажетті бөлмелер қарастырылмаған еді. Ал жаңа ғимаратта арнайы пән кабинеттері орналастырылып, заманауи үлгідегі құрал-жабдықтармен, оқуға қажетті жиһаздармен қамтылған», - делінген акиматта.

Ұстаздарға да барлық жағдай жасалып, өскелең ұрпаққа сапалы білім берулеріне мүмкіндіктер қарастырылған. Кітапхананың іші кең, сөрелер оқушыға қажетті әдебиеттермен толықтырылған, ал мәжіліс залында түрлі мәдени көпшілік шаралар ұйымдастыруға мүмкіндік мол. Одан бөлек, спорт залы, асхана, зертана мен медициналық көмек көрсету бөлмелері жабдықталған.

Аудан орталығы – Ақсукент ауылында «Шаттық» балабақшасы пайдалануға берілді. Мұнда 280 бала мектепалды тәрбиемен қамтылмақ. «Балапан» бағдарламасы аясында салынған бұл ғимараттың құрылысына републикалық бюджеттен 356,347 млн. теңге жұмсалды. «АРХидея plus» ЖШС-нің жобасы бойынша бұл нысанның құрылысын «РСУ-1» ЖШС-гі жүргізді.