Латын әліпбиі нұсқасының көп болуы таңдау мүмкіндігін арттырады - Артур Платонов

«Қазақстан әлемде барлық қоғамдық маңызды мәселелер халықтық талқылауға салынатын жалғыз мемлекет десек қателеспейміз. Демократияландыру логикасы барлық заңнамаларымызда көрініс табуда, ал осы латын әліпбиіне көшуді талқылау сенім білдіру деңгейін көрсетіп отырғандай. Мәселен, батыста халыққа осылай болады деп айтылып қана  қойылады, ал адамдар өздерінің пікірін білдіріп жатса оны елеп, ескермейді. Ал, бізде қоғам биліктік бақылауды күшейтуге негізделген батыстық логикаға қарағанда қоғамның билікті бақылауы күшейтілуде», - деді сөз басында Мәжіліс депутаты.

Спикердің айтуынша, мемлекеттік тілді латын әліпбиіне көшіру көптеп тақылануда, осы ретте ұсыныстар мен пікірлер де өте көп.

«Кириллица дәстүрі біздің алдымазда бір есікті ашады, ал латын дәстүрі оған қосылып, тағы басқа бір әлемді ашуда. Яғни синтез арқылы жаңа ашуларға бағытталғанбыз, баи түсудеміз. Бұл мүмкіндіктерімізді кеңейту арқылы өзге мәдениетпен танысу болып табылады. Мемлекет басшысы айтып кеткендей, латын әліпбиіне көшу ол бүгінгі құндылықтарымызды жою емес, керісінше оны байыта түсу», - деп жалғастырды Артур Платонов.

Ruh.kz  хабарлағандай,  халық қалаулысының пайымынша, тарихқа көз жүгіртетін болсақ,  қазақ елі қашанда адами құндылықтарды алдыңғы қатарға қойып келген. Сондықтанда латын әліпбиіне көшу қадамының маңыздылығы уақыт өте келе сезіледі.

«Уақыт өте келе көпшілік бұл қадамның қаншалықты көреген екенін түйсігімен түсінеді деген ойдамын. Президентімізге кеше ғана тағы бір латын әліпбиінің нұсқасы таныстырылды. Жалпы, Мемлекет басшысы бұл әліпбидің баршамызға ыңғайлы болуы шарт деп баса айтқан болатын.  Менің ойымша, осындай үлгілер көп бола берсін, сонда таңдауға мүмкіндікте соншалықты көп болады.   Мені қуантатыны осы латын әліпбиін талқылауда бұқараның қалыс қалмай, атсалысып жатқаны», - деп түйіндеді Артур Платонов. 

Естеріңізге сала кетейік, күні кеше ғана ҚР Президенті Нұрсұлтан Назарбаев мемлекеттік тілді латын қарпіне көшіру жөніндегі жобаны іске асыру үшін құрылған жұмыс тобының мүшелерімен кездесті. Жиында Мемлекет басшысына қоғамдық талқылаулар барысында келіп түскен ұсыныстарды ескере отырып әзірленген қазақ тілінің латын қарпіне негізделген бірыңғай стандартының жобасы ұсынылды.