Шығыс Қазақстанда медициналық робот техникасы орталығы ашылмақ
Шығыс Қазақстанда денсаулық сақтау саласын дамытуға бағытталған үшжылдық кешенді жоспарға сәйкес, өңірдегі медициналық мекемелер заманауи құрал-жабдықтармен қамтамасыз етіледі.
Алдағы таңда межеге алынған жоспарлардың бірі – Қазақстандағы тұңғыш робот техникасы орталығын ашу.
«Дәрігерлер үшін жаңа мүмкіндіктерге бастайтын жоба. Олардың жоғары біліктілігі іс жүзінде тәжірибеде қолданылғаны қажет. Облыста сонымен қатар, трансплантология орталығын да ашу қажет», - деп атап өтті Даниал Ахметов.
ШҚО әкімінің баспасөз қызметі хабарлағандай, облыста онкология, қан айналым жүйесі аурулары, ана мен баланы қорғау, травматология сияқты маңызды бағыттар бойынша дәрігерлердің біліктілігін арттыруға бағытталған бағдарлама да жемісті нәтижесін беруде. 150 маман ағылшын тілін меңгеріп, олардың дені шетелдік жетекші оқу орындарында машықтанудан өтіп жатыр.
Даниал Ахметов атап өткендей, денсаулық сақтау саласына бөлінетін қаражат көлемі ұлғаймаса, қысқармайды. Бірнеше жылда Шығыста сапалы, жаңа бағыттағы медицина қалыптасады. Жаңа мекемелер ашылады, олардың ішінде Семейдегі ядролық медициналық орталық бар.
