• Басты
  • Мемлекеттік қызмет істері агенттігінде «А» корпусына іріктеудің қалай өткені тралы айтып берді

Мемлекеттік қызмет істері агенттігінде «А» корпусына іріктеудің қалай өткені тралы айтып берді

9 Қазан, 2017 17:49
Биылғы жылы «А» корпусына іріктеу екі лауазым бойынша жүргізілді: комитеттердің төрағалары және аудандардың әкімдері. Жалпы, іріктеудің қалай өткені жайында ҚР Мемлекеттік қызмет істері және сыбайлас жемқорлыққа қарсы іс-қимыл агенттігі төрағасының орынбасары Айгүл Шаимова «А» корпусы әкімшілік мемлекеттік қызметінің кадрлық резервіне іріктеу қорытындыларына арналған баспасөз конференциясында айтып берді.

«А» корпусының лауазымдарын қысқарту іріктеу процесіне әсер еткен жоқ. Ол бұрынғысынша қалды. Үміткерлер заңдарды білу бойынша тестілеуден, жеке біліктіліктерін бағалаудан, сондай-ақ логикалық ойлау қабілетін тексеруден өтеді. Заңдарды білу бойынша тестілеу қорытындылары бойынша оң нәтижелер алған үміткерлер уәкілетті комиссияларға әңгімелесуге жіберіледі», - деді А. Шаимова.

Конкурста 619 үміткердің арасында мемлекеттік қызметшілер ғана емес, сонымен қатар мемлекеттік емес сектор өкілдері де болды.

«Олардың ішінде комитет төрағалары қызметіне – 80 адам, ал аудандар әкімдері қызметіне 472 адам  үміткер болған. Өтінімдердің санына қарай, «А» корпусы институтына қызығушылықтың бұрынғысынша жоғары екенін байқауға болады», - деп атап өтті ол.

Айгүл Шаимованың айтуынша, Агенттік құжаттарды ағымдағы жылғы 15 қыркүйекке дейін қабылдаған.

«Құжаттарды қабылдау аяқталғаннан кейін біз оларды біліктілік талаптарына және қолданыстағы заңнама талаптарына сәйкестікке бағаладық. "Мемлекеттік қызмет туралы" заңда үміткерлер мемлекеттік қызметке түсе алмайтын шарттар көзделген. Егер үміткердің алынбаған соттылығы болса немесе мемлекеттік қызметке түсуге дейін үш жыл ішінде сыбайлас жемқорлық құқық бұзушылықтары үшін әкімшілік жауапкершілікке тартылса немесе қылмыстық сыбайлас жемқорлық қылмыстары үшін сотталған болса, ол мемлекеттік қызметке түсе алмайды. Сондай-ақ "А" корпусына іріктеу қағидаларында Ұлттық комиссияға тапсырылатын барлық құжаттардың белгіленген талаптарға сәйкес келуі тиіс екені көзделген», - деді А. Шаимова.

Сонымен қатар, белгіленген талаптарды үміткерлердің барлығы бірдей сақтаған жоқ. Нәтижесінде, 99 үміткерге келесі кезеңге өтуден бас тартылды.

Сондай-ақ, Агенттік төрағасының орынбасары айтып өткендей, тестілеуді өткізер алдында Агентік пен оның аумақтық бөлімшелері үміткерлер үшін заңнама нормаларын түсіндіру курстарын ұйымдастырған.

Ақбота Күзекбай

Барлық жаңалықтар