• Басты
  • «Астана Операның» алғашқы гастролі Алматыда өтеді

«Астана Операның» алғашқы гастролі Алматыда өтеді

10 Қаңтар, 2014 14:10
2014 жылдың 4-10 ақпан аралығында Алматыда «Астана Опера» Мемлекеттік Опера және балет театрының алғашқы гастролі өтеді. Ұжымның өздік деген қойылымдары Абай атындағы МАОБТ-да сахналанады, деп мәлімдеді «Астана Операда» өткен баспасөз конференцияда театр директоры Төлеген Мұхамеджанов.

«Алғашқы гастролдік сапарды біз 4-10 ақпан аралығында Алматыдан бастағалы отырмыз. Көрермен назарына бұл уақытта бір опера, екі әлемдік би өнерінің теңдессіз туындысы, балаларға арналған С.Прокофьевтің «Петя мен қасқыр» музыкалық оркестрі мен Симфониялық оркестрдің гала-концерті ұсынылады», - дейді директор.

Театрдың алғашқы гастролі аясында опера тыңдармандары «Біржан-Сара» операсын тыңдауға мүмкіндік алады және Шарль Жюданың «Ромео мен Джульеттасы» мен Ресей халық әртісі Борис Эйфманның «Роден» балеті қойылады.

Директордың айтуынша, гастролдік жоспар қазірден бастап мақұлданған. Енді театр ұжымы сапарға дайындалу үстінде.

«Біз үшін бұл сапар сынақ болғалы тұр. Бұл қойылымдарды барлық қазақстандықтар мен шетел тамашалап, «Астана Опера» ұжымының шығармашылығына өзіндік бағаларын береді», - дейді Төлеген Мұхамеджанов.

Естеріңізге сала кетейік, «Астана Опера» театрының шетелдік гастролдері 8 наурызда Санкт-Петербургтегі Мариинский театрынан бастау алады. Осы гастрол аясында Пьера Луиджи Пиццаның «Аттиласы» қойылып, Григоровичтің «Ұйқыдағы аруы» мен Александровтың «Біржан-Сарасы» сахналанады.

 

 

 

Барлық жаңалықтар