Ассамблея кәсіби медиацияны дамыту бойынша жүйелі жұмыс жүргізуде - Д. Мыңбай

6 Қазан, 2017 19:34

Ассамблеяны 2025 жылға дейін дамыту тұжырымдамасында елде медиация институтын дамыту ҚХА жұмысының жаңа бағыттары ретінде белгіленген. Бұл туралы ҚХА төрағасы Дархан Мыңбай Шымкенттегі Қазақстан халқы Ассамблеясының Медиация кеңесінің аясында ұйымдастырылып отырған «Қоғамды жаңғыртудағы медиацияның ролі» атты диспут-форумда хабарлады.

Д. Мыңбай еске салып кеткендей, Президент Нұрсұлтан Назарбаев Ассамблеяның XXV сессиясында «Рухани жаңғыру» бағдарламасының мәнін аша отырып, «медиаторлар желісін дамыту және қоғамда халықтың құқықтық мәдениетін арттыру қажет» деп атап көрсетті.

«2011 жылғы 28 қаңтарда Қазақстанның тұтастай құқықтық жүйесі үшін айтарлықтай оқиға болған «Медиация туралы» Заң қабылданды. 2011 жылғы 3 шілдеде Үкіметтің қаулысымен Медиаторларды дайындау бағдарламасы бойынша оқыту ережелері бекітілді. Осылайша, елімізде медиация институтын енгізу және дамыту үшін нормативтік-құқықтық негіз қалыптастырылды. 2016 жылы Қазақстан Республикасының Азаматтық, Қылмыстық, Әкімшілік, Салық, сондай-ақ Қылмыстық- және Азаматтық-процестік кодекстеріне, «Қазақстан Республикасындағы жергілікті мемлекеттік басқару және өзін-өзі басқару туралы» Заңға тиісінше өзгерістер мен толықтырулар күшіне енгізілді», -деді Д. Мыңбай.

Қазіргі кезде Қазақстан халқы Ассамблеясы қоғамдық медиаторлар институтын қалыптастырып, дамытуға және әлеуметтік дау-жанжалдарды алдын ала реттеуге арналған кәсіби медиацияны дамыту бойынша жүйелі жұмыс жүргізуде.

Ассамблеяның жалпыреспубликалық инклюзивтік желісі дамуда. ҚХА Медиация кеңесі құрылған, Достық үйлері жанынан 17 кабинет ашылған, облыстарда 13 медиация кеңесі жұмыс істейді, аудандық, селолық, ауылдық деңгейдегі қоғамдық келісім кабинеттерінің саны - 1019 бірлікті құрайды.

Барлық жаңалықтар