Үкіметтің бұйрығымен «Балапан» мемлекеттік бағдарламасы 2020 жылға дейін ұзартылды

«Қоса беріліп отырған Балаларды мектепке дейінгі тәрбиемен және оқытумен қамтамасыз ету жөніндегі 2010 – 2020 жылдарға арналған «Балапан» бағдарламасы бекітілсін», - делінген қаулының мәтінінде.

 «Балапан» бағдарламасы Қазақстанда 2010-жылы ел Президенті Нұрсұлтан Назарбаевтың халыққа жыл сайынғы жолдауында айтылған тапсырмасына сай дайындалған. Бағдарламаның жүзеге асырылу мерзімі 2014-жылға дейін белгіленген. Мемлекеттік бағдарламаның алдына қазақстандық балаларды мектеп алды тәрбиесімен 70% қамту жөніндегі міндеті қойылған болатын.

Бағдарламаға сай, 2015 жылға дейін мектепке дейінгі тәрбиемен және оқытумен мектепке дейінгі жастағы балалардың 77 %-ының, ал 2020 жылға дейін – 100 %-ының қамтылуын қамтамасыз ету; 2015 жылға дейін 5-6 жастағы балаларды мектепалды даярлықпен толық қамтуды қамтамасыз ету; республикадағы демографиялық жағдайды және халықтың білім алуға деген қажеттілігін ескере отырып, мектепке дейінгі ұйымдардың вариативті желісін арттыру көзделген.

«Бағдарламаны 2014 – 2020 жылдары іске асыру жөніндегі іс-шараларды қаржыландыру көлемі 190 млрд. 536 млн. теңгені құрайды, оның ішінде:республикалық бюджет есебінен – 41 млрд. 242 млн. теңге; жергілікті бюджет есебінен – 149 млрд. 294 млн. теңге», - деп көрсетілген бағдарамада.