Астанада тұрмысы төмен, көп балалы және аз қамсыздандырылған отбасыдан шыққан балаларға әлеуметтік көмек көрсетіледі

9 Қаңтар, 2014 11:40

Елордада 10 қаңтар-10 ақпан аралығында «Қамқорлық» республикалық акциясы өтеді. Олар әлеуметтік аз қамтылған отбасыларға көмек көрсетеді. Бұл туралы астана қаласының ресми порталы хабарлады.

«Акция барысында оқымайтын балаларды анықтауға, сабаққа бармаудың алдын алуға, аз қамсыздандырылған отбасылар мен балаларды қамқорлыққа алуға баса назар аударылады. Акцияны дайындау және өткізу бойынша іс-шаралар жоспары жасалып, бекітілді: рейдтік іс-шаралар ұйымдастырылады, тұрмысы төмен отбасыларды аралау, «Қамқорлық» акциясы телефонының ыстық желі қызметін жолға қою және ата-аналарды акцияға тарту. Аталған акция жетім, мүгедек, ата-анасының қамқорлығынсыз қалған, материалдық табысы төмен отбасыларда тұратын балалардың өмір сүру сапасын жақсартуға, қоғамды қайырымдылық көмек көрсетуге тартуға, сонымен қатар, мұқтаж балаларға әлеуметтік көмек көрсету және жаппай оқу мәселесін шешуде қоғамдық ұйымдармен ынтымақтастықты нығайтуға септігін тигізеді», - делінген хабарламада.

Сондай-ақ, акция тұрмысы төмен, көп балалы және аз қамсыздандырылған отбасыдан шыққан, жетім, мүгедек, ата-анасының қамқорлығынсыз қалған балаларға әлеуметтік көмек көрсету және қолдау, сондай-ақ, балалардың сабаққа әлеуметтік себептермен (киім-кешектің, аяқ киімнің, мектепке қажетті жабдықтардың болмауы) қатыспауының алдын алу болып табылады.

Іс-шараның басты міндеті - мектеп жасындағы әр баланың тегін орта білім алу конституциялық құқығын орындау үшін барлық жағдай жасау.