Медициналық пойыздар сапарға шыққалы 333 мың дәрігерлік қабылдау өткізілді

18 Қыркүйек, 2017 11:57

Биылғы сәуірден бастап жолға шыққан «Саламатты Қазақстан» және «Денсаулық» пойыздары еліміздегі шалғайда орналасқан 170 теміржол станциясы мен жол айырықтарына аялдады, деп хабарлады «Қазақстан темір жолы»ҰК»АҚ баспасөз қызметі.

Білікті дәрігерлер Қарағанды, Маңғыстау, Шығыс-Қазақстан, Атырау, Қызылорда, Павлодар, Ақмола, Қостанай, Оңтүстік Қазақстан облыстарының әртүрлі жастағы 8 мың баланы медициналық тексеруден өткізді. Пойыз аялдаған станцияларда сәбилерге арналған балалар алаңдары мен аттракциондары орнатылды.

Қазіргі таңда «Саламатты Қазақстан» медициналық пойызының дәрігерлері Қостанай облысының тұрғындарына қызмет көрсетуде. Қазірдің өзінде олар жеті станцияның тұрғындарының денсаулығын тексерді. «Денсаулық» пойызының дәрігерлері Оңтүстік Қазақстан облысының 16 шағын станциясының тұрғындарын дәрігерлік тексеруден өткізді.

Медициналық пойыздар алыс сапарға шыққалы бері 333 мың дәрігерлік қабылдау өткізді. Оның 214 мыңы диагностикалық емдеу сауықтыру шаралары, 700 шағын амбулаториялық қызметтерін көрсетті.

Маммологтар 5 мың әйелді қараса, тіс дәрігерлеріне 14,8 мың тұрғын көмекке жүгінді. Дәрігерлік бөлмелер сырқаттарды таңғы 9.00-ден кешкі 18.00-ге дейін демалыссыз қабылдайды. Дәрігерлердің қабылдауы, кеңесі, қызметі ақысыз жүргізіледі.

Барлық жаңалықтар