Астанада «Жапонияның 100 заманауи дизайны» көрмесі өтуде

Көрмеде жапон халқының күнделікті өмірде қолданатын 100 түпнұсқа тұрмыстық және интерьер бұйымдары ұсынылды.

Көрменің негізгі бөлігі 2010 жылдан кейін жасалған 89 экспонаттан тұрады. Сондай-ақ, жапон дизайнының негізіне айналған соғыстан кейінгі заманауи 11 дизайн көрмеге қойылды.

«Бұл жылжымалы көрме алғаш рет 2003 жылдан бастап көрсетіле бастады. Бүкіл әлемді аралады деуге болады. Мұндағы экспонаттар кеңінен таныстырылып, жақсы нәтижеге жетті. Көрме қоры тағы да толықтырылып, 2014 жылы АҚШ елдерінен бастап қайтадан көрсетіліп келеді. Биыл Жапон мен Қазақстан арасындағы дипломатиялық қарым-қатынастың орнауына 25 жыл толды. Мұндай байланыс екі елдің өзара ынтымақтастығын әлді де  нығайта түсетініне сенемін», - деді ҚР-дағы Жапония елшілігінің төтенше және өкілетті елшісі Итиро Кавабата көрменің ашылуында.  

Өз кезегінде, ҚР Ұлттық музей директорының орынбасары Марал Балтышев,  Жапон елі дамыған елдердің қатарында екені баршаға белгілі екенін атап өтті.

«Жапонның үнемі жаңартылып отыратын озық технологиясы мен бай мәдениетінен хабардармыз. Бұл көрме барысында жапон халқының тұрмыс заттарымен таныса аласыздар», - деді ол.

Шараның ашылу салтанатына музей қызметкерлері, шетелдік қонақтар және Қазақстанның қоғам қайраткерлері қатысты.