ИЫҰ саммитінде Астана декларациясына қол қойылды
10 Қыркүйек, 2017 19:14
Қазақстан Президенті Нұрсұлтан Назарбаев Ислам ынтымақтастығы ұйымының ғылым және технологиялар жөніндегі арнаулы сыйлығын тапсыру рәсіміне қатысты, деп хабарлады Ақорданың баспасөз қызметі.
Мемлекет басшысы жиынға қатысушылардың Қазақстан туралы айтқан жылы лебіздері үшін алғыс білдіріп, ғылым мен технологияларды дамыту жолындағы ынтымақтастықты нығайтудың өзекті екенін атап өтті.
Бірінші жұмыс сессиясының соңында саммиттің қорытынды құжаты – Астана декларациясына қол қойылды.
Сондай-ақ, Нұрсұлтан Назарбаев Ислам ынтымақтастығы ұйымының бас хатшысымен бірге ислам елдерінің аса көрнекті ғалымдарын ғылым мен технологияларды дамытуға қосқан үлесі үшін берілетін арнаулы сыйлықпен марапаттады.
Соңында Қазақстан Президенті сессияға қатысушыларды халықаралық «ЭКСПО-2017» мамандандырылған көрмесінің жабылу рәсіміне шақырды.
