• Басты
  • 2018 жылғы 1 шілдеден бастап базалық зейнетақы еңбек өтіліне байланысты есептеледі

2018 жылғы 1 шілдеден бастап базалық зейнетақы еңбек өтіліне байланысты есептеледі

9 Қыркүйек, 2017 12:11
Елбасының тапсырмасына сәйкес, бұдан әрі базалық зейнетақы төлеу жүйесі өзгертілетін болады. Тиісінше, 2018 жылдың 1 шілдесінен бастап базалық зейнетақы 2017 жылмен салыстырғанда 1,5 есеге өседі. Бұл туралы ҚР Еңбек және халықты әлеуметтік қорғау вице-министрі Светлана Жақыпова әлеуметтік-еңбек саласы бойынша азаматтарды қабылдау барысында хабарлады.

Оның сөзінше, мұндай жүйе 30-40 жыл еңбек өтілі бола тұра ең төменгі зейнетақы алып отырған азаматтарға тиесілі қаражат алуын қамтамасыз етеді. Ал, 1998 жылға дейін 33 жыл еңбек өтілі бар жандарға, сондай-ақ, 1998 жылдан кейінгі тәжірибесін ескере отырып, зейнетақы құны 2 есеге өспек.

«Қазіргі таңда Министрлік тарапынан 2018 жылдың 1 шілдесінен бастап енгізілетін базалық зейнетақыны тағайындаудың жаңа тәсілін түсіндіру тұрғысында белсенді жұмыс жүргізілуде. Басты мақсат – әрбір қазақстандыққа зейнетақы мөлшері  азаматтардың еңбек өтіліне тікелей байланысты төленетіндігін жеткізу. Егер бүгінде базалық зейнетақы азаматтардың еңбек өтіліне қарамастан барлығына бірдей аударылатын болса, 2018 шілдің 1 шілдесінен бастап зейнетақы азаматтың еңбек өтіліне байланысты есептеледі», - деді Вице-министр.

Қабылдау барысында Вице-министр азаматтар тарапынан қойылған сұрақтарға толық жауап берді. Келіп түскен арыз-шағымдардың көпшілігі  денсаулық жағдайына байланысты мүгедектікті алуға, жұмыспен қамту мәселесі, зейнетақымен қамсыздандыру сұрақтарына қатысты болып отыр.

Қабылдау қорытындысы бойынша, Вице-министр, азаматтардың барлық өтініштерін жан-жақты зерделеп, шешу жолдары бойынша тиісті іс-қимылдар қолға алынатынын мәлімдеді.

Барлық жаңалықтар