Францияның павильоны экспозицияның бір бөлігін Астанада қалдырады

Франция павильонының жұмысын қорытындылай келе, комиссар жалпы 54 іс-шара өткізіліп, оның 20-сы жоғары халықаралық деңгейде ұйымдастырылғанын атап өтті.

«Мен үшін ЭКСПО-2017 көрмесі өте қызықты тәжірибе болды, мен бұған дейін де сіздің еліңізбен таныс едім, алайда, бұл көрме оны жақынырақ білуге мүмкіндік берді. Мұндағы халық өте жақсы. Біздің павильонымызға 600 мың келуші келген және бұл өте жақсы нәтиже деп санаймыз. Біздің павильонымызда сондай-ақ өткен Еуразиялық кинофестиваль аясында іс-шаралар ұйымдастырылды», - деп бөлісті Паскаль Лоро. 

Бұдан бөлек, Франция өз экспонаттарының бір бөлігін қалдыруды шешті, олар Астана қаласының Оқушылар сарайына тапсырылатын болады.

«Біз кейбір объектілерді қалдырамыз, мысалы, панно, фотосуреттер. Оларды қазақстандық білім алушылар Францияның мәдениетімен көбірек танысу мүмкіндігіне ие болуы үшін қалдырамыз. Экспонаттардың кейбіреулері Шанхай халықаралық музейіне жіберіледі», - деп хабарлады павильон басшысы.

Сондай-ақ, Экспо-2017 көрмесі Қазақстанға өзін халықаралық аренада көрсетуіне мүмкіндік берді, деп түйіндеді спикер. 

Еске сала кетейік, көрменің жабылуы 2 күннен кейін – 10 қыркүйекте өтеді. Қазіргі уақытта көрмеге келушілердің жиынтық саны 4 млн адамға жеткен.  

Ақбота Күзекбай