Ақтауда ағзалар мен тіндерді трансплантациялау мәселесі талқыланды

Денсаулық сақтау министрлігі хабарлағандай,  іс-шара алғашқы рет шетелдік және отандық мамандардың қатысуымен өткізілуде, оның мақсаты ағзалар мен тіндерді трансплантациялаудың мәселелерін, нефрология мен диализді, сондай-ақ нефрологиямен байланысты ғылымды дамытудың жаңа бағыттарын талқылау болып табылады.

Гемодиализ, перитонеальды диализ және бүйректі трансплантациялау – бұл бүйрек жеткіліксіздігіне шалдыққан науқастар үшін алмастырушы бүйрек терапиясының негізі бөліктері.

Конгресс Қазақстан, жақын және алыс шетелден келген 250-ден аса делегат, трансплантологтар мен консервативті нефрология мамандары үшін диалог алаңы болмақ. Іс-шара барысында отандық және шетелдік трансплантациялық ғылымды дамыту, трансплантациялық көмек көрсетудің бірыңғай стандарттары мен тәсілдерін енгізу, білікті мамандарды дайындау, үздік шетелдік тәжірибелерді пайдалану және халықаралық ынтымақтастықты дамыту мәселелері талқыланады. Нефрологтардың халықаралық және еуропалық қоғамдарының өкілдері үздік шетелдік тәжірибені ұсынады.

Конгрестің миссиясы – өңірлік деңгейдегі ортақ проблемаларды шешу, бүйрек патологиясы бар пациенттерге медициналық көмек көрсету, сондай-ақ алғашқы медициналық-әлеуметтік буын деңгейіндегі үздік отандық және шетелдік тәжірибелерді енгізу болып табылады. Осыған байланысты, Маңғыстау обылысының әлеуметтік бағытталған саясаты Ақтау қаласын диалог алаңы ретінде таңдауға мүмкіндік берді.

Конгресс шеңберінде дәстүрлі V Халықаралық қазақ-түрік нефрологтарының конгресі өтеді, оның жұмысына Түркияның нефрология саласындағы жетекші мамандары қатысады.

Конгресс 8 қыркүйекте өз жұмысын жалғастырады.