Қазақстан мен Франция арасындағы сыртқы сауда айналым 45,9%-ға өсті

 Үкіметаралық комиссия отырысында сауда мен инвестиция, энергетика, соның ішінде жаңартылған энергия көздері, ғарыштық қызмет, қоршаған ортаны қорғау, ауыл шаруашылығы, денсаулық сақтау және тағы басқа да салалар бойынша екіжақты ынтымақтастық мәселелері талқыланды.

ИДМ баспасөз қызметі хабарлағандай,  Жеңіс Қасымбек өз сөзінде Францияның мамандандырылған «ЭКСПО-2017» халықаралық көрмесіне қатысуы екі елдің өзара іс-қимылының жоғары деңгейде екенін және жаһандық тұрақты дамуды қамтамасыз ету мәселелері бойынша ұстанымдарының бір екенін айғақтайды, деп атап өтті.

«Қуатты экономикалық әлеуетке ие Франция Қазақстанның Еуропадағы негізгі сауда серіктестерінің бірі. Екі ел арасындағы тауар айналымның өсім динамикасы қарқынды. 2017 жылдың 6 айында Қазақстан мен Франция арасындағы сыртқы сауда айналым 1,7 млрд. АҚШ долларын құрады. Бұл өткен жылдың сәйкес кезеңімен салыстырғанда 45,9%-ға жоғары», - деді Жеңіс Қасымбек.

Франция Қазақстанның негізгі сауда серіктестері тізімінде 5-ші орынды иеленеді. Сонымен қатар, Франция Қазақстанға инвестиция салу деңгейі бойынша да 5-ші орында. Бұл ел соңғы 12 жылда Қазақстанға 13,6 млрд. доллар инвестиция салған.

Тараптар келесі үкіметаралық комиссияның отырысын Францияда өткізуге уағдаласты. Өтетін орны мен нақты уақыты дипломатиялық каналдар арқылы қосымша келісілетін болады.