Қазақстанда жаңа жүк электровоздары тәжірибелік қолдануға шығарылды
«КZ-8А сериялы жүк электровоздары Екібастұз-Тобыл, Екібастұз-Пресногорьковская аралығында тәжірибеден өткізілуде. KZ8 A электровозының бірінші нұсқасын жобалауда «Прима» тектес жүк электровозы негізге алынды. Кейін ол Қазақстанның -50 мен +50 градус аралығындағы ауа райы жағдайындағы қолданысына негізделген 1520 мм-лік жолға ыңғайландырылды», - делінген хабарламада.
Аталмыш серияның қоссекциялы электровозы 8800 кВт қуаттылыққа ие. Ал конструкциялық жылдамдығы 120 км/с. Жаңа машинада басқару мен диагностиканың кешенді микропроцессорлық жүйесі қарастырылған. KZ8A электровозында ауа-райы бақылауын басқару модульді кабинеті бар. Ол қауіпсіздік пен заманауи санитарлық-эргономикалық талаптардың барлығына жауап береді.
Айта кету керек, аталмыш локомотивтер ВЛ-80 сериялы электровоздарды алмастырады. Осыған орай, айтарлықтай тиімділікке қол жеткізіледі деп күтілуде. Атап айтар болсақ, электр қуаты үнемделіп, ағымдағы жөндеу мен техникалық қызмет көрсету шаралары азаймақ.
