Конституциялық өзгерістер одан әрі жаңғыртудың берік негізін қалайды – Н.Назарбаев

Іс-шараға Парламент депутаттары, орталық мемлекеттік органдар жетекшілері, халықаралық ұйымдар өкілдері, таяу және алыс шет елдердің құқық саласының сарапшылары, еліміздің ғылыми қауым өкілдері қатысты.

Мемлекеттік хатшы конференцияда Қазақстан Президентінің форумға қатысушыларға арналған құттықтауын оқып берді.

Құттықтауда Мемлекет басшысы конституциялық реформа еліміз дамуының 25 жылдық тәжірибесін және жұртшылық пікірін ескере отырып жүргізілгенін атап өткен. Оның негізі – билік тармақтары арасында бірқатар өкілеттіктерді қайта бөлу, Парламент пен Үкіметтің дербестігін кеңейту, конституциялық құндылықтарды, адамның және азаматтың құқықтары мен бостандықтарын қорғау тетіктерін нығайту, сот жүйесі мен мемлекеттік басқаруды жаңғырту.

«Конституциялық өзгерістер қоғам мен мемлекеттің тыныс-тіршілігінің барлық саласын одан әрі жаңғыртудың берік негізін қалайды. Осы тұрғыдан Қазақстандағы конституциялық реформа және оны іске асыру қазақстандықтардың да, шетелдік қонақтарымыздың да зор қызығушылығын тудырады», – делінген Нұрсұлтан Назарбаевтың құттықтауында.

Сондай-ақ, конференцияда Қазақстан Жоғарғы сотының төрағасы Қ.Мәми, Армения Конституциялық сотының төрағасы, Жаңа демократия елдерінің конституциялық бақылау органдары конференциясының төрағасы Г.Арутюнян, Грузия Жоғарғы сотының Төрағасы Н.Гвенетадзе, Венеция комиссиясының өкілі С.Кузнецов және т.б. құттықтау сөз сөйледі.

Конференцияға қатысушылар Қазақстан Президентінің бастамасымен елімізде жүргізілген конституциялық реформа нәтижелерін айрықша атап өтті. Олар реформалардың Қазақстанды Үшінші жаңғырту ісінің табысты іске асырылуына септігін тигізетініне сенім білдірді.