Қазақстан мен АҚШ зерттеулер саласында ынтымақтастықты кеңейту келешегін қарады
29 Тамыз, 2017 11:47
Үкімет үйінде ҚР Премьер-Министрі Бақытжан Сағынтаев АҚШ-тың энергетика министрінің бірінші орынбасары Дэн Бруйллэтпен (Dan Brouillette) энергетика саласында екіжақты ынтымақтастықты нығайту мәселелері бойынша кездесу өткізді, деп хабарлады primeminister.kz.
Кездесу барысында Қазақстанда американдық ірі трансұлттық компаниялармен бірлескен индустриалды жобаларды іске асыру барысы талқыланды.
Сондай-ақ, тараптар Энергетикалық серіктестік бойынша қазақстандық-американдық бірлескен комиссия жұмысын нығайту арқылы жаңа технологиялар мен зерттеулер саласында ынтымақтастықты кеңейту келешегін қарады.
2017 жылы ҚР мен АҚШ арасындағы дипломатиялық қарым-қатынастың орнағанына 25 жыл толады. АҚШ – Қазақстандағы екінші ірі инвестор (2,2 млрд $). Қазақстанда американдық капиталдың қатысуымен 500-ге жуық компания жұмыс істейді.
