Ақмола облысында «Туған жер» бағдарламасы аясында дәрігерлік амбулатория жөндеуден өткізілді

Аймақ әкімдігінен хабарлағандай, «Родина»Агрофирма» ЖШС-ның басшысы  Иван Сауэр Мемлекет басшысының «Болашаққа бағдар: рухани жаңғыру» атты мақаласына үн қатқан аймақтағы кәсіпкрелердің алғашқысы болды. Ол өз қаражатының есебінен қайтарымсыз негізде 30 млн теңгеге Родина ауылындағы дәрігерлік амбулаторияға күрделі жөндеу жүргізді. Сонымен қатар, күндізгі стационар ғимаратын салып, қажетті медициналық құрал жабдықтармен жабдықтады.

Бұдан басқа, бүгінде Зеленый Гай ауылында мәдени-сауықтыру кешенінің тұрмыстық ғимараты қайта қалпына келтірілуде.

«Мұнда медициналық мекеменің барынша тиімді жұмыс істеуі үшін бар жағдай жасалған. Сонымен қатар, онда жергілікті 2000-нан астам тұрғынға қызмет көрсетіледі. Бұдан басқа, жақын орналасқан тағы 4 ауылдың тұрғындарына көмек көрсетілетін болады. Ал, мен өзім елордалық медициналық университетті тәмәмдағаннан кейін «Дипломмен ауылға» жобасы бойынша жақында ғана келдім. Маған баспана берді, орналасуыма көмектесті», – деді амбулаторияның аға дәрігері Алена Злодеева.

Ал, зейнеткер Анна Иванова аталмыш медициналық мекемеде сапалы қызмет көрсетілетінін атап өтті.