Еліміздің аймақтарында сотқа дейінгі және пенитенциарлық пробацияны енгізу мәселелері талқылануда

22 Тамыз, 2017 19:13

Алматыда Мәжіліс депутаты Светлана Бычкова мен «Нұр отан» партиясы қалалық филиалының қызметкерлерінің оңтүстік астанадағы Қылмыстық-атқарушы жүйе дапартаментінің орталық аппараты қызметкерлерімен кездесуі өтті, деп хабарлады ҚР ІІМ ҚАЖ комитетінің баспасөз қызметі.

Кездесу барысында 2016 жылдың 30 желтоқсанында қабылданған «Пробация туралы» заңды жүзеге асыру барысы талқыланды.

Қатысушылар атап өткендей, аталмыш заң аясында сотқа дейінгі және пенитенциарлық пробация үлгілері енгізілді, олар аясында алмастыру жұмыстары жүргізілді.

Сонымен қатар, ҚР Парламенті Мәжілісінің депутаты ҚАЖ қызметкерлерінің сұрақтарына жауап берді.

Бұдан бөлек, Көкшетау қаласында өткен кездесуде ҚР Парламенті Мәжілісінің депутаты Гүлнәр Бижанова «Нұр Отан» партиясының Ақмола облыстық филиалы төрағасының орынбасары Ғалым Бекмағамбетовпен және «Нұр Отан» партиясының Көкшетау аумақтық филиалы төрағасының орынбасары Зәуреш Нұрымовамен бірге ҚАЖК Ақмола облысы бойынша департаментінің қызметкерлерімен кездесті.

ҚАЖК облыстық департаментінің өкілі Ирина Горнованың айтуынша, жеке құраммен кездесу нәтижелі өтті. Гүлнәр Қадыржанқызы пенитенциарлық жүйенің проблемалары мен негізгі мәселелеріне қызығушылық танытты. Атап айтқанда, Парламент Мәжілісінің депутатын сотталғандардың жұмыспен қамтылуы және олардың кәсіби даярлығы қызықтырды.

«Сотталғандарда бүгінгі таңда еңбек нарығында талап етілетін жұмысшы мамандықтарын алу мүмкіндігі бар екені қуантады», - деп атап өтті жұмыс барысында Гүлнәр Қадыржанқызы.

Кездесуге қатысушылар ҚАЖК департаментінің жергілікті атқарушы билікпен және Ақмола облысының жұмыспен қамту және әлеуметтік бағдарламалар басқармасымен өзара іс-қимылын атап өтті.

Сапар барысында қонақтар ҚАЖК облыстық департаментінің мүзейінде болып, өңірдің қылмыстық-атқару жүйесінің қалыптасу тарихымен танысты.