Қазақстанда 2017-2021 жылдарға арналған көші-қон саясаты тұжырымдамасы әзірленуде
19 Тамыз, 2017 15:17
ҚР Еңбек және халықты әлеуметтік қорғау министрлігінде, мемлекеттік ортақ мүдде мен көші-қон үдерістерінің әлемдік даму үдерістерін сақтай отырып, алдағы бес жыл көлеміндегі стратегиялық мақсаттар мен міндеттерді және негізгі көзқарастарды айқындайтын 2017-2021 жылдарға арналған көші-қон саясаты тұжырымдамасы әзірленуде.
Ведомствоның хабарлауынша, құжатта басты межелер ретінде орнықты әлеуметтік-экономикалық дамуды және елдің ұлттық қауіпсіздігін қамтамасыз ету аясында халықты үйлестірілген тең сипатта қоныстандыру мен жұмыс күшін тиімді орналастыруға қол жеткізу көзделуде.
Алға қойылған мұрат үдесінен шығуда бірқатар түйткілдерді тарқату болжануда: шетелдік жұмыс күшін іріктеу мен қолданудың сараланған тетіктерін түзу; ішкі көші-қонды дамыту мен халықтың ұтымды орын ауыстыруын қолдау; шетелде тұратын этникалық қазақтардың Қазақстан Республикасына қоныс аударуына жағдай жасау мен көшті ынталандыру, олардың бейімделіп, ықпалдасып кетуіне септесу; заңсыз көші-қонға қарсы тұру.
