18 Тамыз, 2017 16:56

Гуандун оңтүстік-шығыс Азия әлеміне «терезе» бола алады – А.Байеділов

Қазақстан мен Қытайдың арасындағы қатынас шекара маңындағы саудадан стратегиялық серіктестікке ұласты. Аса маңызды бағыттардың бірі Қазақстан аймақтарының Қытай провинцияларымен байланысты дамытуы. Бұл туралы Қазақстандық инвестициялық ынтымақтастық агенттігінің басшысы Айдын Байеділов ЭКСПО-2017 аясындағы Қытайдың Гуандун провинциясы апталығының салтанатты ашылуында хабарлады.

«Гуандун – Қытайдың экономикалық көшбасшысы. Сондықтанда біздің аймақтар мен Астана және Алматы қалаларына осындай алпауытпен байланыс орнату алдыңғы қатарда болғаны жөн. Гуандун оңтүстік-шығыс Азия әлеміне «терезе» бола алады. Осы ретте, Қазақстандық инвестициялық ынтымақтастық агенттігі қазақстандық аймақтың Гуандун провинциясымен іскерлік байланыс орнатуына ықпалдастық жасауға дайын. Тараптардың ынтымақтастық орнатуға мүмкіндіктері жетерлік», - деп атап өтті А. Байеділов.

Гуандун провинциясының бас хатшысының орынбасары Ли И Вей өз сөзінде Қытай мен Қазақстан көне заманнан бері серіктес екенін тілге тиек етті.

«Қытайда жақсы тәмсіл бар: «Кездесу үшін мың шақырым жерден жақсы достар ғана келеді». Гуандун апталығын өткізу аясында жолығуымыздың өзі тағдырымыздың ортақ екенін көрсетіп тұр. ЭКСПО-ның «Болашақтың энергиясы» атты тақырыбы Қытайдың жасыл экономикалық дамуының тұжырымдамасымен тығыз байланысты. Гуандун провинциясы ежелгі теңіз «Жібек жолының» маңызды нүктесі», - деді Гуандун провинциясының бас хатшысының орынбасары Ли И Вей.

Қазақстандық инвестициялық ынтымақтастық агенттігінің баспасөз қызметі хабарлағандай, Қазақстанның және қытайлық провинцияның бизнес орталарының іскерлік кездесулері өткізілді. Сонымен қатар, қытайлық әртістердің қатысуымен театрлық қойылым қойылды.

Айта кетер болсақ, Гуандун провинциясы Қытайдың оңтүстік-шығысындағы субтропикте орналасқан, аумағы 177,9 мың шаршы шақырымды құрайды.

Провинцияның 3368 шақырым құрлықтық желісі бар және теңіз биологиялық ресурстарға өте бай. Теңіз қайраңында мұнай өндірісі де жолға қойылған. Өзге де пайдалы қазбалар арасында германий, висмут, талий, тантал, селен сынды сирек кездесетін металлдардың кен орны аса үлкен маңызға ие.

Гуандунда Шэньчжэнь, Чжухай, Шаньтоу атты Қытайдың үш арнайы экономикалық аймағы бар. Гонконгпен және Макаомен көршілес орналасуы да провинцияның экономикалық дамуына оң ықпалын тигізеді.

Қазіргі уақытта Гуандун ЖІО көлемі бойынша ҚХР провинцияларының алдыңғы орнында тұр.

Барлық жаңалықтар