«Қазақстан 2050» қозғалысы қоғамдық сананы жаңғырту мақсатында қандай жобаларды жүзеге асырады

«Қазақстан-2050» Жалпыұлттық қозғалысы  Ұлттық комиссия аясында  бірқатар жобаларды жүзеге асырып жатыр.

«Бізде ірі зәкірлі жобалар мен бастамалар бар,  біз оларды Азаматтық қоғаммен бірлесіп жүзеге асырып жатырмыз.  Жобаларға келетін болсақ, «Рухни жаңғыру» бағдарламасына енген ірі жобалардың  бірі  «Краудсорсинг kz». Бұл жоба қоғам мен жергілікті атқарушы билік арасындағы  коммуникациялық кедергілерді жоюға бағытталған. Біз Батыс Қазақстан облысының  Орал қаласында пилоттық жобаны жүзеге асырып жатырмыз», - деді Мұхтар Манкеев.

Ол айтып өткендей, келесі жылдан бастап қозғалыс аталмыш жобаны өзге өңірлерде жүзеге асыруды жоспарлап отыр.

«Біз әкімдіктер мен министрліктер жақсы бағдарламаларды жүзеге асырып жатқандығын білеміз, олар әлеуметтік санат пен бизнесті қолдауға  бағытталған. Алайда, сараптама жүргізе келе  жұртшылық аталмыш бағдарламалардың  мағынасын толық түсінбей жатқанына көзіміз жетті. «Краудсорсинг kz» негізінде әкімдіктер мен министрліктер барлық бағдарламаларды жариялай алады.  Одан әрі әкімдік пен қоғам арасындағы талқылау жүзеге асырылады. Осылайша, белсенді азамат ең үздік консультант ретінде билік алдында өзін көрсетуі керек.  Себебі, қоғамның белсенді еместігі туралы мәселе көп көтеріледі», - деді қозғалыс төрағасы.

Жалпыұлттық қозғалыс басшысы латын әліпбиіне көшу бойынша да бағыт бар екенін айтып өтті.

«Біз 1929-1940 жылғы  «Қазақ кітаптары» көрмесін іске қосқан едік. Латын тілінде шыққан  1500 кітаппен ауқымды жұмыс жүргізілді. Біз оларды Ұлттық академиялық кітапханамен бірігіп жүзеге асырдық. Бұл көрме жыл соңына дейін тегін болмақ. Сондай-ақ, біз ашық пікірталас ретінде «Move up 2050» бастамасын іске қостық. Жұртшылық қоғамдық сананы жаңғырту аясында әртүрлі бағдарламалармен жұмыс істегісі келеді. Сондықтан да біз кездесулерді саябақта, демалыс орындарында өткізіп жүрміз», - деді спикер.

Ақбота Күзекбай