Е.Сағадиев талапкерлерге қосымша грант бөлу туралы түсініктеме берді (ВИДЕО)
15 Тамыз, 2017 17:51
Үкімет отырысы аясында оқу орындарына бюджеттік орынға түспей қалған талапкерлерге қосымша грант бөлу туралы ҚР БҒМ Ерлан Сағадиев түсініктеме берді.
«Республикалық комиссия жан-жақты қарастырып, қосымша гранттар бөліп, дұрыс шешімге келді деп есептеймін. Биыл комиссияның жұмысына ата-аналардың өкілдері қатысты және олар грант бөлу үдерісінің ашықтығын өздері көрді», - деп атап өтті Е. Сағадиев.
Оның сөзіне қарағанда, биылғы оқу жылында терең өзгерістер болмайды.
«Білім саласындағы ең маңызды шешімдер былтыр қабылданып, ағымдағы жылы сол жұмыстарды ары қарай жалғастырамыз», - деді министр.
Естеріңізге сала кетейік, Үкімет отырысында білім және ғылым министрі елімізде білім гранттары қалай бөлінетіні туралы кеңінен айтып берді.
Ақбота Күзекбай
