Маңғыстау облысында Еңбек және халықты әлеуметтік қорғау министрлігінің күндері өтеді
Министрлік өкілдері жұмысын Түпқараған ауданынан бастап, халықпен кездесу өткізеді және азаматтарды жеке мәселелері бойынша қабылдайды.
Жұмыс тобының мүшелері халықпен жүздесу барысында Қазақстанның бүгінгі зейнетақы жүйесі туралы әңгімелеп, 2018 жылдан базалық зейнетақыны тағайындаудағы өзгерістер жайына тоқталады. Соңғы шешім қазақстандық азаматтарға қазіргіге қарағанда көбірек зейнетақы алуға мүмкіндік береді.
ҚР ЕХӘҚМ хабарлағандай, министрліктегі құрылымдық бөлімше мамандары халықты жұмыспен қамту саласында мемлекет тарапынан қарастырылған мүмкіндіктер жайын қозғап, әлеуметтік көмек көрсету мен бос жұмыс орындарына бағыттаудағы техникалық-өндірістік білім беру ұйымдарында тегін оқыту сияқты қолдау шараларын тарқатады.
Еске сала кетейік, бұрын Еңбек және халықты әлеуметтік қорғау министрлігінің күндері Ақмола, Солтүстік Қазақстан және Оңтүстік Қазақстан облыстарында өткен болатын. Іс-шараның мақсаты - қазақстандықтардың еңбек заңнамасы саласындағы құқықтарын және мемлекеттен әр түрлі көмек алу мүмкіндіктерін түсіндіру.
