Астана мектептерінде 46 робототехника кабинеті ашылады

11 Тамыз, 2017 08:46

Астанада биылғы оқу жылында 23 000 бала алғаш рет мектеп парталарына отырады. Бұл туралы Астана қаласының білім басқармасы басшысының міндетін атқарушы Әнуар Жанғозин Орталық коммуникациялар қызметінде өткен брифингте айтып берді.

Астананың 95 жалпы білім беру мектебі бірінші сыныпқа баратын балаларды қабылдауға дайын. Астана қаласы білім басқармасының мәліметі бойынша, елордада оқушылар орындарының жетіспеушілігі орын алуы мүмкін.

«Осыған орай, қазір мектептерге 5 қосымша құрылыс аяқталуға жақын, оларды 2017-2018 оқу жылының басында пайдалануға беру жоспарланып отыр. Қазіргі уақытта 6 мектептің құрылысы басталды, жыл соңына дейін тағы 4 мектептің құрылысы басталады», - деді Ә. Жанғозин.

Оның айтуынша, өткен оқу жылында жалпы білім беру мектептерінің барлық 1-ші сыныптары жаңартылған білім беру мазмұнына көшкен болатын.

«Әрбір сабақта мұғалімдер сыни және аналитикалық ойлау қабілетін дамытатын технологияларды қолдануы тиіс. Бағалаудың критерийлік жүйесі өте маңызды компонент болып табылады, ол білім беру ұйымдарының ашықтығына ықпал етеді. Оқытудың жаңартылған мазмұнын сәтті іске асыру үшін қалалық мұғалімдер кеңесі құрылды», - деп атап өтті Ә. Жанғозин.

Сондай-ақ, 2017-2018 оқу жылында жаңартылған бағдарлама бойынша 1, 2, 5, 7 сыныптарда 4149 мұғалім жұмыс істейтінін атап өткен жөн. Педагогтердің 75%-ы курстарды өтті. Тағы 156 бастауыш сынып мұғалімі мен 787 пән мұғалімі 2017 жылдың желтоқсан айына дейін курстардан өтпек.

Бұдан бөлек, отандық тарих пен география, әдебиет бойынша сабақтарды мұражайларда өткізу жоспарлануда. Жаңа оқу жылында Астана мектептерінде 46 робототехника кабинеті ашылады.

Барлық жаңалықтар