Солтүстік-Шығыс-Оңтүстік транзитінің жобасын іске асыру барысы туралы (ВИДЕО)

10 Тамыз, 2017 12:51

«Үкіметте өткен 2015-2019 жылдарға арналған «Нұрлы жол» инфрақұрылымды дамытудың мемлекеттік бағдарламасын іске асыру барысына арналған баспасөз конференциясында Қазақстан Республикасы энергетика вице-министрі Бақытжан Жақсалиев Солтүстік-Шығыс-Оңтүстік транзитінің 500 кВ ӘЖ құрылысы» ірі инвестициялық жобасының кезеңдері қалай іске асырылып жатқаны жайында айтып берді.

«Энергетика кешені кез келген ел экономикасының дамуында ерекше орын алады. «Нұрлы жол» мемлекеттік бағдарламасын іске асыру аясында энергетика кешенін дамытуға ерекше көңіл бөлінген. Энергетика кешенін дамыту тұрғысында біз «Солтүстік-Шығыс-Оңтүстік» транзитінің 500 кВ әуе желісінің құрылысы жайында айтамыз. Қазақстанның аумағы айтарлықтай үлкен. Тұтынушыларды энергиямен тұрақты қамтамасыз ету үшін осы электр энергиясының тұтынушыларға жеткізілуін қамтамасыз ететін желілерді салу қажет», - деп түсіндірді Б. Жақсалиев.

Оның айтуынша, Қазақстанда табиғи энергетикалық ресурстар шоғырланған аймақтар бар және осы өңірлердегі генерация едәуір көлемде орын алады.

«Солтүстік өңір басқа өңірлер үшін донорға айналып келеді. Осылайша, солтүстіктің қуаттылығы бойынша профицитті аудандарынан оңтүстіктің қуаттылығы бойынша тапшы аудандарына электр энергиясы мен қуаттылықтың жеткілікті көлемін беру қажет. Бұдан бөлек, оңтүстік өңір экономикалық дамудың жоғары қарқынына ие. «Солтүстік-Оңтүстік» жобасы болашақта расталады», - деді вице-министр.

«Солтүстік-Шығыс-Оңтүстік» жобасының өзі 2 кезеңмен іске асырылады. Бірінші кезеңге 500 кВ «Екібастұз – Шұлба ГЭС - Өскемен» желі құрылысы енгізілген.

«Осы тармақты іске асырудың мақсаты желінің өткізу қабілетін ұлғайту және Шығыс Қазақстан облысындағы қуаттылық тапшылығының өтелуін қамтамасыз ету болып табылады. Бірінші кезеңді іске асыру мерзімі – 2011-2017 жылдар. Жоба құны 53,3 млрд теңгені құрайды», - деп ақпараттандырды спикер.

Бақытжан Жақсалиев толық қаржыландыру «KEGOC» компаниясының қаражаты есебінен жүзеге асырылатынын және бүгінде барлық құрылыс-монтаж жұмыстары сәтті аяқталғанын жеткізді.

«500 КВ электр өткізу желілері салынды, бұл «Екібастұз – Шұлба ГЭС-Өскемен». Жалпы ұзындығы - 598,5 км және 220 КВ. Барлық қосалқы станциялардағы құрылыс-монтаж жұмыстары аяқталды», - деді энергетика вице-министрі жобаның бірінші кезеңі жайында.

Еске сала кетейік, бірінші кезең өткен жылғы 6 желтоқсанда іске қосылған болатын.

«Солтүстік-Шығыс-Оңтүстік» транзиттік дәлізінің екінші кезеңіне 500 КВ «Шұлба ГЭС – Ақтоғай – Талдықорған - Алматы» желісінің құрылысы енгізілген. Осы жобаның іске асырылуы «Солтүстік-Оңтүстік» бағытындағы ұлттық электр желісінің транзиттік әлеуетін ұлғайтуға мүмкіндік береді.

«Бұл жобаны іске асыру мерзімі – 2012-2018 жылдар. Жоба құны 105,5 млрд теңгені құрайды. Қаржыландыру компанияның өз қаражаты есебінен де және «KEGOС» АҚ купондық облигациясымен 47,5 млн теңгені құрайтын БЖЗҚ-дан алынған қаражат есебінен де жүзеге асырылады. Екінші кезеңді іске асыру кестеге сәйкес жүргізілуде, қазіргі уақытта объектінің барлық учаскелерінде құрылыс-монтаж жұмыстары жүргізіліп жатыр. Жалпы ұзындығы 883 км құрайды, желілер – 500КВ», - деп қорытындылады вице-министр Бақытжан Жақсалиев.