Қарағанды облысында жас ауыл кәсіпкерлеріне гранттар табысталды

4 Тамыз, 2017 20:19

Қарағанды облысында он жас кәсіпкер ауылдар мен кенттерде бизнестерін дамыту үшін гранттарға ие болды. Гранттарды салтанатты түрде табыстау рәсімі Абайда ауыл жастарының ХІV форумы аясында өтті.

Өңір әкімдігінде хабарлағандай, жастар үшін оқыту семинарлары ұйымдастырылған, онда жастарды жұмыспен қамтуға және кәсіпкерлікті дамытуға бағытталған мемлекеттік жастар жобалары мен бағдарламалары туралы айтылды.

Форум барысында ауылдағы кәсіпкерлікті дамыту және қолдауға облыс әкімінің грантын табыстау рәсімі өтті.

"Бүгін біз форум аясында жақсы әңгіме құрдық, қызықты сұрақтарды талқыладық. Болашақта тағы жиналамыз деген үміттемін. Жастар – ел болашағы. Сол себепті келесі жылдан бастап біз грант көлемін екі есеге, миллион теңгеге дейін көтеруді шештік", - деді облыс әкімі Ерлан Қошанов.

Грант көлемі 200 000 мен 500 000 теңге аралығында болды. Бұл қаржыға жастар өз істерін дамытпақ.

Айта кетейік, ауыл жастарының форумын өткізу Қарағанды облысында дәстүрге айналған. Шараның басты мақсаты – ауыл жастарының өзекті мәселелері мен сұрақтарын ортаға салып, шешу жолдарын қарастыру, аталған бағыттағы атқарушы органдар мен үкіметтік емес ұйымдардың бірлескен іс-әрекетін үйлестіру, жастарды әлеуметтік қолдау. Сонымен қатар, форум – ауыл жастарына мемлекеттік бағдарламалар мен жобаларды түсіндіру.

Барлық жаңалықтар