20 жамбылдық білім беру нысаны күрделі жөндеуден кейін ашылады

Баяндамада атап көрсетілгендей, қазіргі таңда әулиеата өңірінде үш ауысымдағы 4 мектеп бар.

Спикердің айтуынша, ағымдағы жылы 22 білім нысанын (14 мектеп, 5 балабақша, 2 колледж, 1 мектептен тыс мекеме) күрделі жөндеуден өткізуге 3 млрд 156 млн 39 мың теңге бөлінді.

«Бүгінде 22 білім нысанының 20-да жөндеу жұмыстары жүргізілуде. Ал, 2 білім нысанында жұмыстар басталмай отыр. Атап айтар болсақ, Байзақ ауданы Сарыкемер ауылындағы Ғ.Мұратбаев атындағы о/м,  Шу ауданы Төле би ауылындағы Е.Бекмаханов атындағы о/м ғимараттарының күрделі жөндеу жұмыстары басталмаған. Осыған байланысты, білім мекемелерінің жаңа оқу жылына дайын болмай қалу қаупі бар», - деді Жәмилә Бекбатырова.

Бұдан басқа, 2017 жылы 135 білім нысанын (69 мектеп, 15 балабақша, 9 мектептен тыс мекеме)  ағымдағы жөндеуден өткізуге 308,896 мың теңге бөлінді.

«Қазіргі таңда 135 білім нысанының 133-де жөндеу жұмыстары жүргізілуде. Ал, 2 білім нысанында жұмыстар басталмай отыр. Дәлірек айтсақ, Талас ауданы Үшарал ауылындағы Ә.Сағынтаев атындағы орта мектебі мен «Ұлбике» балабақшасының  ғимараттарында. Алайда, білім бөлімі тарапынан мемлекеттік сатып алу рәсімдерінің мезгілінде жүргізілмеуіне байланысты, бүгінгі күнге жеңімпаз анықталмаған. Осыған байланысты, бюджет қаражатының уақытында игерілмеуі және білім мекемесінің жаңа оқу жылына мерзімінде дайын болмай қалу қаупі туындап отыр», - деп атап өтті Жәмилә Бекбатырова.