• Главная
  • Астанада ЭКСПО-2017 көрмесі аясында Батыс Қазақстан облысының күндері басталды
1 августа, 2017 17:01

Астанада ЭКСПО-2017 көрмесі аясында Батыс Қазақстан облысының күндері басталды

31 шілде және 4 тамыз аралығында Батыс Қазақстан облысының мәдениет күндері аясында Астанада 10 концерттік бағдарлама, 8 театрландырылған қойылым және мәдени көрмелер өтеді. Бұл туралы Орталық коммуникациялар қызметінде Астанадағы ЭКСПО-2017 халықаралық көрмесі аясында Батыс Қазақстан облысының күндерін атап өтуге арналған баспасөз конференциясында Батыс Қазақстан облысы әкімінің орынбасары Арман Өтеғұлов хабарлады.
Астанада ЭКСПО-2017 көрмесі аясында Батыс Қазақстан облысының күндері басталды

БҚО әкімінің орынбасары атап өткендей, өңір тұрғындары халықаралық мамандандырылған көрмеге қатысты әр түрлі іс-шараларға белсенді қатысуда. Бұдан бөлек, облыс әкімдігінің мәліметі бойынша бүгінгі күнге дейін Батыс Қазақстан облысының 30 мыңнан астам тұрғыны ЭКСПО-2017 көрмесін көру мақсатымен Астанаға келген.    

«Жалпы, ЭКСПО-2017 көрмесінің ашылу рәсіміне Батыс Қазақстан облысынан 200-ден астам өкіл келген. Олардың арасында мемлекеттік органдардың өкілдері, депутаттар, мұғалімдер, дәрігерлер, студенттер және блогерлер бар. Көрменің алғашқы күндері облыстың 3 мыңнан астам тұрғыны, соның ішінде студенттер мен оқушылар ЭКСПО-2017 көрмесінің жұмысына белсенді қатысқан. 1 тамызға дейінгі кезеңде ЭКСПО көрмесінде өңіріміздің 30 мыңнан астам тұрғыны болған. 31 шілде және 4 тамыз аралығындағы кезеңде Батыс Қазақстан облысының мәдениет күндері аясында 10 концерттік бағдарлама, 8 театрландырылған қойылым, қолөнер көрмелері мен музей көрмесі өтеді», - деп ақпараттандырды А. Өтеғұлов.

Сондай-ақ, этноауылда елорда тұрғындары мен қонақтары облыстың қолөнер шеберлерінің жұмыстарын көре алады. 

«Батыс Қазақстан облысының мәдениет күндері аясында қала тұрғындары батысқазақстандық ұжымдардың үздік жұмыстарымен танысу, Орал әртістерін көру мүмкіндігіне ие болады. Жалпы 600 шығармашылық ұжым өнер көрсетеді», - деп атап өтті әкім орынбасары. 

Сондай-ақ, Арман Өтеғұлов ақпараттандырғандай, тамыз айының ортасында елордада ауыл шаруашылығы жәрмеңкесін ұйымдастыру жоспарланып отыр. Жәрмеңке дәстүр бойынша екі күн өтеді. Айта кету керек, өткен жылы қыркүйекте Батыс Қазақстан облысының ауыл шаруашылығы жәрмеңкесі ұйымдастырылған болатын. 

Ақбота Күзекбай