Биыл «Мектепке жол» акциясы аясында 300 мың оқушыға көмек көрсетіледі

31 Шілде, 2017 18:53

Биыл "Мектепке жол" республикалық акциясы аз қамтамасыз етілген және көп балалы отбасылардан шыққан 300 мыңнан астам оқушыны қамтиды. Бұл туралы ҚР БҒМ Мектепке дейінгі және орта білімді қорғау комитеті төрағасының орынбасары Мәншүк Әбдікәрім мәлімдеді.

«Биылғы жылы жергілікті атқарушы органдар осы акция аясында көмекке мұқтаж 300 мыңға жуық баланың тізімін дайындады. Балаларға көмек көрсетуге дайын демеушілердің тізімі құрастырылды. Сондай-ақ көмекке мұқтаж және акцияға белсенді қатысып, тиісті материалдық көмек алуы тиіс отбасылардың жеке тізімі де бар. Бүгінгі күні оқытумен қамтылмаған балаларды анықтауға, мектепті босатудың алдын алуға баса назар аударылуда, сондай-ақ экономикалық мүмкіндіктеріне байланысты, балаларының мектеп іс-шараларына қатысуын қамтамасыз ете алмайтын аз қамтамасыз етілген және көп балалы отбасыларға шефтерді бекіту жүргізіледі», - деді М. Әбдікәрім.

Төраға орынбасары атап өткендей, балаларды мектепке тасу мәселесіне баса назар аударылады. Министрлік жергілікті атқарушы органдарға осы жұмысты тапсырды.

«Мектептері жоқ ауылдар бар және балаларды мектепке тасуды қамтамасыз ету керек. Бүгінде 22 278 баланы мектепке тасу ұйымдастырылған. 768 автобус дайындалды. 42%-ы жаңартылды. Сондай-ақ жергілікті атқарушы органдар қазірдің өзінде заңнамаға сәйкес тегін ыстық тамақпен қамтамасыз етілетін және қамтамасыз етілуі тиіс балалардың жекелеген санаттарының тізімін дайындап, талдау жүргізуі тиіс», - деп атап өтті ол.

Мәншүк Әбдікәрімнің айтуынша, «тәуекел тобына» жататын балаларды анықтау бойынша рейдтер жүргізу жоспарланып отыр.

«Әрбір елді мекенде, қала маңында, саяжайларда, фермалар мен шаруашылықтарда «тәуекел тобына» жататын балаларды анықтау бойынша рейдтер жүргізілетін болады. Бұл панасыз, қараусыз қалған балалар, жағдайы төмен отбасылардан шыққан балалар, оқудан бас тартатын балалар мен қайыршылықпен айналысатын, далада жұмыс істейтін балалар. Балалардың мұндай санаты жергілікті атқарушы органдар мен ішкі істер органдары жүргізетін рейдтер барысында анықталатын болады. Соның нәтижесі бойынша мекенжайлық, дербес тізімдер құрастырылады», - деп түйіндеді М. Әбдікәрім.

Еске сала кетейік, ағымдағы жылы «Мектепке жол» жалпы республикалық акциясы «Менің таңдауым – балаларға көмек көрсету!» ұранымен өтуде.