ПМХЗ-да 12 технологиялық қондырғы жаңғыртылуда

21 Шілде, 2017 15:14

Жұмыс сапары аясында ҚР Премьер-Министрі Бақытжан Сағынтаев Қазақстандағы мұнай өнімдерін өндіретін ірі кәсіпорындардың бірі - «Павлодар мұнай-химия зауыты» ЖШС-ін жаңғырту барысын тексерді, деп хабарлады primeminister.kz.

«Павлодар мұнай-химия зауыты» ЖШС бас директоры Шухрат Данбай жаңғыртуды аяқтағаннан кейін жоғары октанды бензин өндірісі 297 мың тоннаға ұлғаятынын, сондай-ақ халықаралық Jet A1 стандартты авиаотын өндірісі қамтамасыз етілетінін баяндады.

ПМХЗ жаңғырту жобасы бойынша 12 технологиялық қондырғы мен 16 жалпы зауыттық шаруашылық нысаны салынып және жөнделіп жатыр. Жаңғыртудан кейін ақшыл мұнай өнімдері өндірісі жылына 333 мың тоннаға артады.

Зауытты жаңғырту аясында сондай-ақ қолданыстағы қондырғыларды жөндеу жүргізілуде, бұл ағымдағы жылдың соңында К4, К5 стандартты дизель отынын және авиациялық отын өндіруді бастауға мүмкіндік береді.

Жалпы, ПМХЗ жаңғырту тұтынушыларды сапалы мұнай өнімдерімен қамтамасыз етуге және жаңа технологиялар енгізу, басқаруды автоматтандыруды арттыру есебінен қоршаған ортаға жүктемені азайтуға мүмкіндік береді.

Естеріңізге сала кетейік, «Павлодар мұнай-химия зауыты» ЖШС – Қазақстан Республикасының үш мұнай өңдеу зауытының бірі. Зауытта 1900 астам адам жұмыс жасайды.

Бүгінгі таңда кәсіпорынның өндірістік қуаты жылына 5,1 млн. тонна мұнайды құрайды. Кәсіпорын Қазақстанның ішкі нарығын мұнай өнімдерімен қамтамасыз етеді, сондай-ақ Ресей, Өзбекстан, Қытай, АҚШ, Нидерланды, Италия, Украина сияқты елдерге өнімдер жеткізеді.

Барлық жаңалықтар