«Менің арманым» ұлттық жастар байқауының жеңімпазы 5 млн теңгеге ие болады

ҚР Білім және ғылым министрлігі Ғылым комитетінің төрағасы Болатбек Әбдірәсілов байқаудың мазмұны туралы айтып берді.

«Білім және ғылым министрлігі ұлттық жоба, «Менің арманым» байқауының басталуы туралы жариялайды. Бұл байқаудың мақсаты – біздің жастарымыздың әлеуметтік белсенділігін, сондай-ақ шығармашылық қабілеттерін анықтау және дамыту. Ең алдымен, осы байқау Президенттің «Болашаққа бағдар: рухани жаңғыру» бағдарламалық мақаласында айтылған идеялары шеңберінде іске асырылатын әлеуметтік жобаларды қолдауға бағытталғанын атап өткім келеді. Осы жағдайды пайдалана отырып, БАҚ арқылы жастарды байқауға қатысуға шақырамыз. Жастар неғұрлым көбірек қатысса, байқау да соғұрлым қызықты өтеді», - деп түсіндірді Б.Әбдірәсілов.

Ғылым комитетінің төрағасы хабарлағандай, осы байқауға 14-29 жас аралығындағы жастар қатыса алады.

Байқау бес бағыт бойынша өткізіледі: экологиялық орта, білім беру, технологиялық, әлеуметтік-мәдени орта.

«Менің арманым» байқауының соңғы кезеңі телевизиялық әлеуметтік-зияткерлік шоу болмақ, ақтық жарысқа қатысуға  ең үздік 64 жобаның авторы Астана қаласында  жиналады.

«Байқау «Хабар» агенттігінің алаңында ток-шоу түрінде өтетін болады. Алдымен, қатысуға арналған өтінімдер қабылданады, кейін телевизиялық бағдарламалар түрінде өтеді», - деп атап өтті Б.Әбдірәсілов.

Қатысуға өтінімдер 2017 жылғы 20 шілде және 1 қыркүйек аралығында байқаудың www.meninarmanym.kz ресми сайтында қабылданады. Жоба «Рухани жаңғыру» бағдарламасының қолдауымен іске асырылады. Жобаларды құрамына Қазақстан Республикасының белгілі қоғам қайраткерлері, кәсіпкерлері мен саясаткерлері кіретін кәсіби қазылар алқасы бағалайды.

Ақбота Күзекбай