Қызылорда облысында теміржол желісі ұзарды
17 Шілде, 2017 20:47
Бүгінде Қызылорда облысының аумағынан 18 жұп жолаушы пойызы, оның ішінде мемлекетаралық (Өзбекстан және Ресей Федерациясы) бағыттағы 6 жұп пойызы өтеді.
Өңір әкімдігінің мәліметі бойынша, соңғы екі-үш жылда аймақтағы теміржол қатынасының аясы кеңейе түсті.
2014 жылдың 22 тамызынан «Жезқазған-Сексеуіл-Бейнеу» темір жолы уақытша пайдалануға қосылды.
Осыған байланысты, 2016 жылдың наурыз айында облысаралық «Қызылорда - Жезқазған» темір жол қатынастары ұйымдастырылды.
Осы жылдың 1 шілдесі күні «Қызылорда-Бесарық-Түркістан» жаңа жолаушылар пойызы жолға шықты. «Қала маңындағы тасымал» АҚ-ға қарасты жаңа бағыт бойынша екі вагондық пойыз аптасына 5 күн қатынайды. Ол облыс оңтүстігіндегі барлық аудан орталығы мен станцияларға, разъездерге тоқтайды.
Саладағы тағы бір жаңалық – аймақ теміржол желісі ұзара түсті. «Жезқазған-Сексеуіл-Бейнеу» темір жолының Қызылорда жол бөлімшесіне қарасты Сексеуіл станциясынан Қоскөл станциясына дейін жолдың қашықтығы 271,3 шақырымды құрап, оның бойында Қарашеген, Абай, Аралық станциялары мен 10 бекет салынуда.
