Қарағандыда бюджет есебінен 48 мектеп пен балабақша жөнделеді
13 Шілде, 2017 10:13
Қарағандыда әрбір үшінші мемлекеттік білім ұйымында құрылысшылар жұмыс жасауда. Барлығы қала бойынша олардың саны 130, биылғы жылы 48 нысанда толық және ағымдағы жөндеу жұмыстары жоспарланған. Бұл үшін қалалық бюджеттен 1,3 млрд теңге бөлінген.
Облыс әкімі Ерлан Қошановтың тапсырмасымен қаладағы барлық білім ұйымдарының қажеттіліктері анықталды. Инфрақұрылым мен модернизация мәселелерін кешенді шешу үшін жөндеу және абаттандыру бойынша, сондай-ақ білім ұйымдарының материалдық базасын нығайту үшін арнайы бағдарлама жасалды.
«Ол кезеңмен жүзеге асырылады. Бүгінгі таңда 2 млрд теңгеден астам сомаға жобалық-сметалық құжаттамалар бар. 2018 жылға арналған жобалық-сметалық құжаттама даярлануда»,- делінген хабарламада.
Мектептерді жабдықтау үшін қалалық бюджеттен 600 млн теңге бөлінді.
2017-2018 оқу жылының басталуына дейін 74 жаңа пәндік кабинет, 16 робототехника лабораториясы жабдықталып, мыңнан аса жаңа компьютер сатып алынбақ.
