БҚО-да «Нұрлы жол» аясында 4 мектеп салынады

Палатаның баспасөз қызметі хабарлағандай, Парламент Мәжілісінің депутаттары Абай Тасболатов, Бақтықожа Ізмұхамбетов, Павел Казанцев және Қанат Мусин Батыс Қазақстан облысына жұмыс сапармен келді.

Депутатар өңірдегі «Нұрлы жол» бағдарламасы аясында салынып жатқан Орал қаласындағы №4 мектептің құрылысымен танысты. Бұл барлық заманауи талаптарға сай 300 оқушыға арналған Орал қаласындағы №4 жалпы білім беретін орта мектебі.

«Бұл жердегі апатты жағдайдағы мектепті сәуір айында бұзып, бүгін міне, дәл осы жерге «Нұрлы жол» бағдарламасы аясында жаңадан мектеп салынып жатқанын көріп отырмыз. Бұдан былай балалар мына мектептің және бұдан басқа 7 мектептің су жаңа кластарында білім алуға мүмкіндік алады. Мұнда, яғни Орал қаласында біз бизнес-құрылымдарының, үкімет пен партиялық бақылау комиссияларының өзара тығыз қарым-қатынасы құрылыс жұмыстарының қарқынды жүруіне оң әсерін тигізіп отырғанына куә болдық. Бір қуантарлық жәйт, аталмыш нысанды мердігер компания уақытынан бұрын тапсырғалы тұр. Нысандарды қаржыландыруға Ұлттық қордан бөлінген қаражат жұмсалып, президенттің жеке бақылауында, сондықтан біз, депутаттар, қандай да бір проблемаларды анықтау мақсатында өңірлерге арнайы келіп, «Нұрлы жол» бағдарламасы аясында бөлінген қаражаттың тиімді әрі мақсатты пайдаланылуын тексереміз»,  - деді Павел Казанцев.

Айта кетейік, БҚО-да «Нұрлы жол» және «Нұрлы жер» бағдарламасы аясындағы құрылыс нысандарына барлығы 20 млрд.тенге қаражат бөлінген. Қазіргі таңда 2 мыңнан астам адамға арналған 15 көп пәтерлі тұрғын үй салынуда. Сонымен қатар 3 мың оқушыға арналған 8 мектеп салынуда, олардың 4-уі ұлттық қордан бөлінген «Нұрлы жол» бағдарламасы аясында салынуда.