Мәжіліс депутаттары Ақмола облысындағы сайлаушылармен кездесті

Мәжілістің баспасөз қызметі хабарлағандай, Көкшетауда депутаттар  2005 жылы  құрылған  қазақстандық-ресейлік  «Камаз Инжиниринг»  АҚ өнеркәсіптік кәсіпорнына  барды. Бүгінгі таңда зауытта 200-ге жуық адам еңбек етеді. Депутаттарға құрастырылған цехтердің жұмысы таныстырылды. Мәжілісмендер жұмыспен танысқан соң, кәсіпорынның инженерлерімен әңгімелесті. Әңгіме барысында депутаттар облыстағы индустрияның кезеңдеп дамуы туралы мәселе қозғады, өңірдің ірі кәсіпорындары  шағын және орта бизнестің  тапсырмасын орындап отырғанын жеткізді.

«Біз өндірістік үрдісті тамашаладық, жұмысшылармен әңгімелесіп, көкейінде  жүрген сұрақтарына жауап бердік. Жұмысшыларға әлеуметтік  топтама қарастырылған, орташа айлық 140-150 мың теңгеге дейін жетеді. Сондай-ақ, жұмысшыларға  қажетті медициналық көмек те көрсетіледі», - деді Майра Айсина.

Сонымен қатар, депутаттар Көкшетау автобус паркінің  ұжымымен кездесті. Тұрғындармен әңгімелесу барысында  ЖЖМ мен автомобиль бөлшектері бағасының қымбаттылығы, жас отбасыларды баспанамен қамту мәселелері қарастырылды.

«Нұр Отан» партиясының  облыстық филиалында парламентшілер өңірдің үкіметтік емес  ұйымдарының өкілдерімен әңгімелесті. Депутаттар Парламенттегі жұмысы  туралы айтып, қойылған сұрақтарға жауап берді.