ЭКСПО-2017 көрмесіндегі ең танымал шетелдік павильондар анықталды

10 Шілде, 2017 18:13

Ресей, Өзбекстан, Германия, Үндістан, Оңтүстік Корея - бүгінгі таңда ЭКСПО павильондарына келушілердің арасында танымалдылыққа ие. Сондай-ақ, Африка нысандары да ең көп баратын орын болып отыр. Бұл туралы «Астана ЭКСПО-2017» ҰК» АҚ халықаралық қатысушылармен жұмыс атқару жөніндегі департамент директоры Илья Оразақов көрме жұмысына бір ай толуына орай өткен баспасөз конференциясында.

«Павильондардың танымалдылығы туралы айтатын болсақ. Бүгінде олар: Ресей, Өзбекстан, Германия, Үндістан, Оңтүстік Корея және Африка плаза. Келушілер африкалық елдер сынды экзотикалық елдерге көп көңіл аударады», - деді И.Оразақов.

Жалпы, бір ай ішінде 27 ұлттық күн мен 54 тақырыптық шара өтті.

«Бүгінгі таңда павильондар жалпы 5 млн.960 мың келушілерді қабылдаған, бір отбасы орташа есеппен 5-тен 7 павильонға дейін тамашалайды. Қатысушылар бізге тәуелсіз түрде дөңгелек үстел мен форумдар өткізе алатынын айтқан болатынбыз. Бүгінгі таңда көрмені 23 ел мен үкімет басшысы тамашалаған», - деді департамент директоры.

И.Оразақовтың айтуынша, павильондар аясында қатысушылар сауда қызметін де жүзеге асыруда. Олардың көп бөлігінде мейрамхана мен қолөнер дүңгіршіктері бар.

Сондай-ақ, бүгінде қатысушылар павильонына баға беретін халықаралық әділқазылар алқасының сессиясы басталды.

«Әділқазылардың халықаралық сессиясы екі рет өтеді. Алғашқысы 10-13 шілде аралығында болса, екіншісі – 4-7 қыркүйек аралығында жұмыс істейді. Халықаралық бюро сарапшылар тобын жіберді. Көрме соңында бірқатар талап бойынша үздік павильондар марапатталады», - деді И.Оразақов.

Айта кетейік, «Астана ЭКСПО-2017» АҚ дирекциясы 10 маусым мен 10 шілде арасындағы көрменің қорытындысын жариялады.

Ақбота Күзекбай