• Басты
  • Малайзия энергиясының 22,5%-ы ЖЭК есебінен өндіріледі

Малайзия энергиясының 22,5%-ы ЖЭК есебінен өндіріледі

10 Шілде, 2017 19:14
Малайзия энергиясының 22,5%-ы гидроэнергетика, күн энергиясы, биогаз және биомасса есебінен өндіріледі. Бұл туралы ЭКСПО-2017 халықаралық мамандандырылған көрмесі аясында өтіп жатқан Малайзияның Ұлттық күнін атап өту барысында Малайзияның энергетика, жасыл технологиялар мен су ресурстары министрінің орынбасары Датук Сери Девамани хабарлады.

Қазіргі таңда Малайзия жоспарға сәйкес  2020 жылға қарай қайта жаңғыртылатын энергия өндірісін 2080 МВт-қа жеткізуді көздеп отыр. Датук Сери СК Девамани өз сөзінде атап өткендей, Қазақстан мен Малайзияның жасыл болашақты қалыптастыруда бар мүмкіндіктерге ие.

«ЭКСПО-2017 тұрақты даму бойынша міндеттемелермен, әдістемелермен бөлісуге мүмкіндік береді. Малайзия павильонында тропикалық орман ұсынылған, ол біздің орманды және биодамыған мемлекеттер ішінде көшбастап тұрғанымызды білдіреді», - деді  Датук Сери Девамани.

Өз кезегінде, ҚР ұлттық экономика вице-министрі Айбатыр Жұмағұлов атап өткендей, сыртқы экономикалық сенімді әрі ұзақ мерзімге негізделген серіктес ретінде Малайзиямен арада түрлі салаларда қатынастарды нығайту көзделіп отыр.

«Астана ЭКСПО-2017»ҰК»АҚ хабарлағандай, осы ретте барлық қажетті механизмдер мен алаңдар қарастырылған.

«Қазақстан Оңтүстік-Шығыс Азия елдері ішінде Малайзияны маңызды  сауда-экономикалық серіктес ретінде қарастырып отыр. Осы орайда сауда-экономикалық байланыстарда екіжақты оңтайлы көрсеткіштерді атап өткім келеді. Қазақстан мен Малайзия арасындағы сыртқы сауда айналымы 2017 жылдың 4 айында 26,1 млн АҚШ долларын құрап, өткен жылдың сәйкес кезеңімен салыстырғанда 30,2 пайызға жоғары болды», - деді Айбатыр Жұмағұлов.

Атап өтер болсақ, ағымдағы жылы Қазақстан мен Малайзия арасында  дипломатиялық қарым-қатынастың орнағанына  25 жыл толып отыр. 

Барлық жаңалықтар