• Басты
  • Қазақстан мен Бельгия саяси және экономикалық қатынастарын нығайтуға ниетті

Қазақстан мен Бельгия саяси және экономикалық қатынастарын нығайтуға ниетті

5 Шілде, 2017 14:33
Астанада Қазақстан Республикасы мен Бельгия Корольдігінің арасында дипломатиялық қатынастардың орнауының 25 жылдығы қарсаңында саяси консультациялар өтті.

ҚР СІМ хабарлағандай, тараптар саяси, экономикалық және мәдени-гуманитарлық ынтымақтастықты дамыту келешегін талқылап, халықаралық күн тәртібінің өзекті мәселелері бойынша пікір алмасты.

Кездесу барысында ҚР сыртқы істер министрінің орынбасары Роман Василенко сұхбаттасушыларды ҚР Президентінің «Қазақстанның үшінші жаңғыруы: жаһандық бәсекеге қабілеттілік» атты Қазақстан халқына Жолдауымен, билік тармақтары арасында өкілеттіктерді қайта бөлу бойынша конституциялық реформалардың негізгі мәнімен, сондай-ақ елдің 2017-2018 жылдары БҰҰ ҚК-ге тұрақты емес мүше болуы кезеңіндегі негізгі басымдықтарымен және бастамаларымен таныстырды.

Тараптар экстремизм мен терроризм қаупінің жаһандануы бүкіл халықаралық қауымдастықтың күш-жігерін анағұрлым терең шоғырландыру, қарсы іс-қимыл жасаудың тиімді стратегиясын әзірлеу қажеттігін талап ететінімен келісті. Біріккен күш-жігеріміз, ең алдымен, радикалды идеологияның алдын алуға және оның таралуының жолын кесуге, күштеу экстремизмімен күресуге дайын барлық құрылымдық күштермен өзара тиімді сұхбат орнатуға бағытталуы тиіс.

Бұдан бөлек, Қазақстан 2015 жылы әлемдік қауымдастықтың қарауына ұсынған БҰҰ аясында Халықаралық терроризмге қарсы күрес туралы жан-жақты қамтитын конвенция қабылдау келешегі туралы мәселе де қозғалды.

Сондай-ақ дипломаттар сауда-экономикалық қарым-қатынастардың дамуының оң динамикасын атап өтті.

Осылайша, 2016 жыл қорытындылары бойынша елдер арасындағы сауда айналымы 2015 жылмен салыстырғанда 12%-ға өсіп, 299,5 млн АҚШ долларын құрады.

Тараптар Қазақстан мен Бельгияның сыртқы саяси ведомстволарының барлық бағыттар бойынша ынтымақтастығын жандандыруға өзара ұмтылысын растады.

Барлық жаңалықтар