Н.Назарбаев мемлекеттік рәміздердің маңыздылығы туралы айтып берді

«Бүрсігүні біз елордамыздың 19 жылдығын атап өтеміз, бүгін дәстүр бойынша еліміздің Туын көтеру рәсімі өтуде. Бұл біздің бірлікке, болашаққа деген құрметіміз. Мемлекет Туы үнемі халықтың, әскеріміздің алдында жүреді. Жеңілген мемлекеттің төбесіне ту тігілетінін өздеріңіз білесіздер. Рейхстагта Кеңес Одағының Туы желбіреген болатын. Біздің ата-бабаларымыз да бір тудың астына бірігіп, ұлы даламызды қорғаған болатын. Біз осы тумен 25 жыл бойы алда келе жатырмыз. Біз бір тудың астына біріккен ұлт құрдық, біздің көгілдір аспан түстес туымыз бар, түстің біркелкілігі еліміздің тұтастығын меңзейді. Күн астында қалықтаған бүркіт халқымыздың жоғары рухын, биік мақсаттар мен жарқын болашаққа деген ұмтылысын танытады», - деп атап өтті ҚР Президенті.

Осы ретте Н. Назарбаев Қазақстан Туының халықаралық аренадағы рөлін де атап өтті.

«Ту, Әнұран және басқа да рәміздеріміз – барлығы елімізді мадақтап, ұлттық рухымызды асқақтатады. Қандай да бір спорттық жарыстарда жеңіске жетсек, Туымыз көтеріліп, Әнұранымыз шырқалады. Қазақстан осы Туымен астанада көптеген ірі халықаралық іс-шараларды өткізген болатын. Біз дауласқан елдерді бейбітшілікке шақыра отырып, құрметке ие болған мемлекетпіз. Біз ядролық қарусыздандыру, жер бетіндегі бейбітшілік үшін күресті бастап келеміз. Бұл құрметтеуге тұрарлық істер. Осында әлемдік дәстүрлі діндер съездері өткізіледі, себебі бізге сенім артады,», - деді Елбасы.

Ақбота Күзекбай

Фото Бауыржан Жуасбаев